Sý tasqyny: BQO-nyń Jánibek aýdanynda tótenshe jaǵdaı jarııalandy
2022 jylǵy 5 sáýir 20:48

Sý tasqyny: BQO-nyń Jánibek aýdanynda tótenshe jaǵdaı jarııalandy

ORAL. QazAqparat – Kóktemgi sý tasqyny zardaptaryn joıý maqsatynda Jánibek aýdanynda tótenshe jaǵdaı jarııalandy, dep habarlaıdy QazAqparat tilshisi.

Jánibek aýdanynyń ákimi Azamat Safımalıevtiń bıylǵy 5 sáýirdegi №1 sheshimine sáıkes Jaqsybaı, Talov jáne Borsy aýyldyq okrýgteriniń aýmaǵynda jergilikti aýqymdaǵy tabıǵı sıpattaǵy tótenshe jaǵdaı jarııalandy.

Aýdan ákimdiginen túsken málimetke qaraǵanda, tabıǵı sıpattaǵy tótenshe jaǵdaılardy joıýǵa aýdan ákiminiń orynbasary Jaqsylyq Abdolov basshylyq etedi.

BQO TJ departamenti málim etkendeı, turǵyndary eń kóp zardap shekken Jaqsybaı aýylynda 97 úıdiń sýǵa ketkeni belgili.

«Qazirgi ýaqytta Jaqsybaıda sý tasqyny zardaptaryn joıýǵa TJ qurylymdarynan 17 adam (2 tehnıka, 4 júzý quraly, 7 motopompa), jergilikti atqarýshy organdardan 70 qyzmetker (3 tehnıka) jumyldyrylǵan. Dalaǵa sý aıdaý, qum salynǵan qaptarmen bekitý jumystary júrgizilýde. Sondaı-aq baǵandar ornatylyp, 8 úıge jaryq berildi. Aqadyr eldi mekeni tusyndaǵy kópir jóndeldi. Qalpyna keltirý jumystaryna sondaı-aq QR UQK Shekara qyzmeti Jánibek shekara basqarmasy men H.Halıýllın atyndaǵy zastavadan 41 adam (7 tehnıka) qatysty», -dedi Jaqsylyq Abdolov.

Osylaısha, Batys Qazaqstan oblysynda tórt aýdanda (Qaratóbe, Shyńǵyrlaý, Bórli, Jánibek) tótenshe jaǵdaı jarııalanyp, soǵan sáıkes tıisti jumystar atqarylýda.

Eske sala keteıik, budan buryn BQO-nyń Tasqala aýylynda tasqyn sý basý qaýpi saqtalyp otyrǵanyn jazǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT