Sý tasqany: Saýran aýdanynda 7 balabaqsha jumysyn toqtatty
TÚRKІSTAN. QazAqparat- Tasqyn sý saldarynan Túrkistan oblysynyń Saýran aýdanynda 7 balabaqsha jumysyn toqtatyp, 11 mektep onlaın oqýǵa kóshti, dep habarlaıdy QazAqparat tilshisi.
Saýran aýdanynda sý kirgen úılerdiń sany 100-den asty. Abaı eldi mekeninde 65, Úlgili eldi mekeninde 14, Babaıqorǵanda 42 úıdi sý basqan.
Sondaı-aq 100 – den astam adam evakýatsııalandy. Onyń ishinde 57 kámelet jasqa tolmaǵan bala bar.
Turǵyn úıin tasqyn sýy basqan turǵyndardy jaıǵastyrý úshin Babaıqorǵan, Abaı, Úlgili aýylyndaǵy mektepterde oryn daıyndaldy. Degenmen, kópshiligi týystarynyń úıin panalaýda. Qazir aýdan aýmaǵynda tasqyn zardaptaryn joıý jumystary júrip jatyr. Quramyna tótenshe jaǵdaılar qyzmeti men ózge de sala mamandary engen jedel shtab quryldy.
Tótenshe jaǵdaıǵa baılanysty Saýran aýdany adamı áleýetti damytý bólimine qarasty 11 mektep onlaın bilim berý júıesine kóshti. Jalpy 4 myńǵa jýyq oqýshy qashyqtan oqıdy. Sondaı-aq, 7 balabaqsha tótenshe jaǵdaıǵa baılanysty jumysyn ýaqytsha toqtatty.
Aıta keteıik, Túrkistan oblysynda jaýǵa nóser men qardyń erýi saldarynan búgin tańerteń birneshe eldi mekendi sý basyp qaldy. Óńirde jedel jeli iske qosyldy. Saýran aýdanynda mektep oqýshylary onlaın oqýǵa kóshti.
Keıin Qyzylorda men Túrkistan oblystarynda aýa raıynyń qolaısyzdyǵynan avtomobıl joldarynyń birqatar bóliginde kólik qozǵalysyna shekteý qoıyldy.
