Elimizde sý resýrstaryn basqarý jónindegi jeke memlekettik organ qurylmaıdy
2022 jylǵy 20 mamyr 12:53

Elimizde sý resýrstaryn basqarý jónindegi jeke memlekettik organ qurylmaıdy

NUR-SULTAN. QazAqparat – Elimizde sý resýrstaryn basqarý jónindegi jeke memlekettik organ qurý josparlanbaǵan. Bul jaıynda Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Qazirgi ýaqytta jańa Sý kodeksin ázirleý jumystary júrip jatyr. Onda eldiń sý resýrstary áleýetin saqtaý úshin ony lastanýdan jáne sarqylýdan qorǵaý negizgi normalarmen aıqyndalatyn bolady. Bul rette jańa kodekste sý resýrstaryn, sondaı-aq gıdrotehnıkalyq qurylystardy basqarýǵa jáne olardyń qaýipsizdigin qamtamasyz etýge qatysty quqyqtyq qatynastardy jeke normatıvtik-quqyqtyq aktige bólip shekteý josparlanýda», - dep atap ótedi Úkimet basshysy jaýabynda.

Budan basqa Premer-Mınıstrdiń dereginshe, sý qaýipsizdigin qamtamasyz etý boıynsha usynystar paketi ázirlengen. Oǵan transshekaralyq ózender boıynsha kelissózder protsesinde Qazaqstannyń pozıtsııasyn kúsheıtý, ýákiletti organnyń, sondaı-aq onyń vedomstvolyq baǵynysty jáne ǵylymı uıymdarynyń kadrlyq áleýetin arttyrý máseleleri kirdi.

«Qazirgi ýaqytta ony Úkimet pen Prezıdent Ákimshiligi qaraıdy. Sonymen qatar, qazirgi ýaqytta sý resýrstaryn basqarý jónindegi jeke memlekettik organ qurý josparlanbaǵanyn atap ótemiz», - dedi Álıhan Smaıylov.

Uqsas jańalyqtar

Jańalyqtar

MURAǴAT