Stadıonǵa kire almaı «Aqtóbeniń» matchyn syǵalap kórgen jigitke klýb sheksiz abonement bermek
2022 jylǵy 27 maýsym 13:11

Stadıonǵa kire almaı «Aqtóbeniń» matchyn syǵalap kórgen jigitke klýb sheksiz abonement bermek

AQTÓBE. QazAqparat – Ortalyq stadıonǵa kire almaǵan jankúıer «Aqtóbe» - «Astana» matchyn stadıon syrtynan syǵalap tamashalaǵan. Qazir jigitti fýtbol klýby izdestirip jatyr, dep habarlaıdy QazAqparat tilshisi.

«Qazir biz ortalyq statsıonǵa kire almaı, oıyndy syrttan tamashalaǵan jigitti izdestirip jatyrmyz. Tek «Astanamen» bolǵan matchta emes, negizi ár oıynda stadıon lyq tolady. Al bul match Qazaqstannyń birneshe dúrkin chempıony bolǵan eki myqty komandanyń oıyny. Sondyqtan jeksenbi kúni bolatyn oıyn bıleti sársenbiden bastap satylymǵa shyǵaryldy. Birer kún ishinde elektrondy bılet túgel satylyp ketti. Al qaǵaz júzindegi bılet kassaǵa sol kúni tústi, ol da lezde ótip ketti. Matchty syrttan tamashaǵan jigit týraly aıtar bolsaq, qazir izdep jatyrmyz. Oǵan «Aqtóbe» FK barlyq oıyndaryna arnalǵan maýsymdyq abonementti syıǵa bergimiz keledi. Oblys ákimi Ońdasyn Orazalın onyń fotosyn kórip, klýbqa shyn janashyr jankúıerge syı jasaýǵa tapsyrma berdi», - dedi «Aqtóbe» FK medıa-ofıtseri Áset Jomart.

Aıta keteıik, keshe fýtboldan el birinshiliginde «Astana» oısyraı jeńildi. Kezdesý barysynda aqtóbelik fýtbolshylar jınaqy qımyl kórsetti. Nátıjesinde 18-mınýtta Vıdemont Ýgo esep ashsa, Shına 33-mınýtta basymdyqty arttyra tústi. Oǵan elordalyq klýbtan Aslan Darabaev 43-mınýtta bir golmen jaýap qaıyrdy. Oıynnyń 73-mınýtynda aqtóbelik klýbtan Álibek Qasym penaltıdi múltiksiz oryndasa, Maksım Samorodov 95-mınýtta qorytyndy esepti belgiledi. Osylaısha «Astana» qarsylasyna 1:4 esebimen ese jiberdi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT