Sot úkimimen Atyraý oblysy ákiminiń orynbasary kinásiz dep tanyldy
2022 jylǵy 18 naýryz 14:08

Sot úkimimen Atyraý oblysy ákiminiń orynbasary kinásiz dep tanyldy

ATYRAÝ. QazAqparat – Sot úkimimen Atyraý oblysy ákiminiń orynbasary kinásiz dep tanyldy, dep habarlaıdy QazAqparat.

Atyraý qalasynyń №2 sotynda Atyraý oblysy ákiminiń orynbasary Qaırat Nurlybaevqa (buryn Atyraý oblysy Aýyl sharýashylyǵy basqarmasynyń basshysy bolyp jumys jasaǵan) jáne «Buıyrǵyn» aýylsharýashylyǵy óndiristik kooperatıvi tóraǵasynyń orynbasary Nurlan Bısembaevqa qatysty QR Qylmystyq kodeksiniń 189-babynyń 4-bóliginiń 2) tarmaǵymen qylmystyq is qaraldy.

«Nurlybaevqa Atyraý oblysy aýyl sharýashylyǵy basqarmasynyń basshysy bola tura, óziniń qyzmet babyn paıdalana otyryp, kooperatıv tóraǵasynyń orynbasary Bısembaevpen adamdar tobynyń aldyn ala sóz baılasýymen, bótenniń múlkin urlady. ıAǵnı AÓK-ǵa ınvestıtsııalyq sýbsıdııa berý arqyly 83 700 649 teńge jymqyrdy, al, Bısembaevqa kórsetilgen somanyń jartysy 41 900 000 teńgeni ıemdengen degen aıyp taǵyldy», -dep habarlady oblystyq sottyń baspasóz qyzmeti.

Sot talqylaýy kezinde aýyl sharýashylyǵy óndiristik kooperatıvine ınvestıtsııalyq sýbsıdııa 4 transhpen berilgeni anyqtalǵan. Kooperatıvtiń ınvestıtsııalyq sýbsıdııa berý týraly ótinishi jáne saraptama uıymynyń ótinishti maquldaýy sottalýshy Qaırat Nurlybaev aýyl sharýashylyǵy basqarmasynyń basshysy laýazymyna taǵaıyndalǵanǵa deıin, ıaǵnı 2019 jyldyń mamyr aıynyń sońynda alynǵan. Al, qalǵan transhtar boıynsha ótinishter burynǵy basqarma basshysynyń ókimimen qurylǵan jumys tobymen maquldanǵan.

«Tergeý men sottalýshylar arasynda agroónerkásiptik keshen sýbektilerin sýbsıdııalaý úshin bólingen aqsha qarajatyn urlaýǵa aldyn ala sóz baılasýdyń bar ekendigine dáleldemeler usynylǵan joq. Sotta zerttelgen dáleldemelermen ınvestıtsııalyq sýbsıdııalar berý týraly ótinishke qosa berilgen qujattardyń tolyqtyǵy úshin AÓK qujattaryn qabyldaǵan bólim basshylary jaýapty ekeni anyqtaldy. Saraptama uıymy jáne jumys tobymen obektiniń óndiristik qýattarynyń sáıkestigin tekserý aktisi jasaqtalyp, basshy – sottalýshy Q.Nurlybaevqa usynylǵan. Sonyń negizinde ol sýbsıdııa berýge arnalǵan shartqa qol qoıǵan. Sot otyrysynda jaýaptalǵan Aýyl sharýashylyǵy mınıstrliginiń mamany jumys toby nemese saraptama uıymymen kelisim berilgennen keıin basqarma basshysy shartqa qol qoıýǵa mindetti ekenin, eger qol qoımaǵan jaǵdaıda ol jaýapqa tartylatynyn aıtyp kórsetken.

Sottalýshy N.Bısembaev AÓK-de materıaldyq jaýapty tulǵa bolyp tabylmaıdy. Alǵashqy úsh sýbsıdııany alý kezeńinde AÓK-de jumys jasamaǵan jáne quryltaıshysy bolmaǵan. Ol 2020 jyldyń 3 tamyzynda dırektordyń orynbasary bolyp jumysqa ornalasqan. ıAǵnı úshinshi transh sýbsıdııasy alǵannan keıin jumysqa ornalasqan jáne onymen materıaldyq jaýapkershilik týraly shart jasalmaǵan», -dep málim etti sottyń baspasóz qyzmeti.

Aýylsharýashylyǵy óndiristik kooperatıvi tóraǵasynyń ótinishimen ol Atyraý qalasynda qus fabrıkasynyń qosymsha obektilerin salý úshin sharýashylyq shotynan alynǵan, sýbsıdııa retinde túsken aqshalaı qarajatqa qurylys materıaldaryn satyp alýǵa kómek kórsetken. Bul jaǵdaıdy kooperatıv ókilderi rastaǵan. Sottalýshylar ınvestıtsııalyq qarajatty ıemdenbegen. Atalǵan qarajatty aýylsharýashylyǵy óndiristik kooperatıvi ıgergen.

«AÓK-ke tıesili qus fabrıkasy jumys isteıdi. Salyqtardy ýaqtyly tóleıdi. Aýdıtorlyq tekserý sýbsıdııa berý rásimin anyqtaǵannan keıin 83 700 649 teńge kóleminde berilgen sýbsıdııa tolyǵymen bıýdjetke qaıtaryldy. Qazirgi ýaqytta AÓK-niń azamattyq talap boıynsha bereshegi joq. Prokýror Q.Nurlybaevqa 10 jyl, Bısembaevqa 7 jyl merzimge bas bostandyǵynan aıyrý jazasyn taǵaıyndaýdy surady. Jábirlenýshiniń ókili keltirilgen zııannyń tolyq ótelgenin aıtyp kórsetti. Sottalýshylar men qorǵaýshylar qylmys quramynyń bolmaýyna baılanysty aqtaýdy surady. Sot sottalýshylar Q.Nurlybaev pen N.Bısembaevtyń áreketterinde qylmys quramynyń bolmaýyna baılanysty olardy kinásiz dep tanydy», -dep habarlady oblystyq sottyń baspasóz qyzmeti.

Sot úkimi zańdy kúshine engen joq.

Eske sala ketelik, buǵan deıin Atyraýda oblys ákimi orynbasarynyń jemqorlyq isi sotta qaralyp jatqanyn jazǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT