Sot saraptamasy qyzmetin tsıfrlandyratyn júıe qashan iske qosylady

NUR-SULTAN. QazAqparat – 2021 jyldyń aqpanynda E-saraptama júıesi ilki rejımde iske qosylady. Bul týraly QR Ádilet vıtse-mınıstri Azamat Ámirǵalıev aıtty, dep habarlaıdy QazAqparat tilshisi.

«2020 jyly mınıstrliktiń qyzmetin, atap aıtqanda zań shyǵarýshylyq, apostıldendirý, sot saraptamasy, jyljymaıtyn múlikti, zańdy tulǵalardy tirkeý, AHAJ jáne basqa da salalardy tsıfrlandyrýǵa baǵyttalǵan 26 jobadan turatyn «Digital Justice» jobalar kesheni ázirlendi. Oryndaý merzimi - 2023 jylǵa deıin. Tsıfrlandyrý ofısi quryldy. 2-kezeń aıasynda E-zan’nama qyzmetine talaptar ázirlendi», - dedi Azamat Ámirǵalıev mınıstrliktiń keńeıtilgen alqa otyrysynda.

Onyń atap ótýinshe, 2020 jyldyń qazan aıynda E-apostıl júıesi iske qosyldy. Ony osy aıdyń ishinde ilki joba aıasynda eGov portaly arqyly engizý josparlanyp otyr.

«Sot saraptamasy qyzmetin tsıfrlandyrý úshin E-saraptama júıesi ázirlendi. Ony osy jyldyń aqpan aıynda ilki rejımde iske qosý josparlanǵan. Jeke tulǵalar úshin jyljymaıtyn múlik kepilin ekinshi deńgeıli bankter arqyly tirkeý boıynsha ilki joba sátti aıaqtaldy. eGov mobile-da neke qııýdy jáne nekeni buzýdy, bala týýdy, tegin, atyn, ákesiniń atyn aýystyrýdy tirkeý týraly tsıfrlyq kýálikterdiń, sondaı-aq jyljymaıtyn múlikke quqyqtardy, zańdy tulǵalardy jáne jyljymaıtyn múlik kepilin tirkeý týraly málimetterdi, anyqtamalar men úzindilerdi alý boıynsha 16 servısterdiń qoljetimdiligi qamtamasyz etildi», - dedi vıtse-mınıstr.