Sońǵy jyldary 770 múgedek bala ınternattan otbasyna oraldy – Tamara Dúısenova
2022 jylǵy 5 shilde 13:01

Sońǵy jyldary 770 múgedek bala ınternattan otbasyna oraldy – Tamara Dúısenova

NUR-SULTAN. QazAqparat – Aýyldyq jerlerde múgedektigi bar jandar úshin syıymdylyǵy shaǵyn úıler ashylady. Bul týraly QR Eńbek jáne halyqty áleýmettik qorǵaý mınıstri Tamara Dúısenova aıtyp berdi, dep habarlaıdy QazAqparat tilshisi.

«Arnaıy áleýmettik qyzmetter naryǵyn kezeń-kezeńimen lıberalızatsııalaý jumysy júrip jatyr. Búginde osy naryqta jeke, memlekettik jáne úkimettik emes sektordyń 900-ge jýyq uıymy bar. Olar «Arnaýly áleýmettik qyzmetter týraly» zańmen bekitilgen kepildi memlekettik qyzmettiń 8 túrin kórsetedi. Bul baǵyttaǵy jumys nátıjesinde sońǵy jyldary 770 múgedek bala ınternattan otbasyna oraldy. 800-ge jýyq ata-ana balalaryn áleýmettik uıymdardyń kúndizgi bólimine tapsyryp, jumysqa ornalasty», - dedi Tamara Dúısenova Úkimettiń búgingi otyrysynda.

Alaıda, mınıstr bul qyzmetterdiń qalalar men oblys ortalyqtarynda ǵana kórsetiletinin aıtty.

Aýylda turatyn múgedektigi bar azamattardyń 45%-dan astamy jergilikti bólimsheler úıde usynatyn jalpy áleýmettik járdemge ǵana qol jetkize alady.

«Sondyqtan, buǵan deıingi tájirıbeni eskere otyryp ınternat úılerin demonopolızatsııalaý jumysy jalǵasady. Onyń ornyna memleket pen jekemenshiktiń áriptestigin paıdalana otyryp, múgedektigi bar azamattar turatyn jerlerde syıymdylyǵy shaǵyn úıler ashylady. Bul shara «Balapan» memlekettik baǵdarlamasy tárizdi iske asyrylady», - dedi Tamara Dúısenova.

Onyń aıtýynsha, qazir elimizde 21 shaǵyn úıler bar, onda 700-ge jýyq azamat qyzmet alyp jatyr. Onyń artyqshylyqtary da az emes.

«Birinshiden, bul úıler aýyl azamattarynyń turǵylyqty jerinde ashylady, ıaǵnı olardy basqa qalaǵa, oblys ortalyǵyna tasýdyń qajeti joq. Ekinshiden, úı janynda bolǵandyqtan, jalǵyzilikti kisiler de, balalar da ortalyqqa kúndiz barady jáne keshke otbasymen birge bola alady. Úshinshiden, árbir shaǵyn syıymdylyqtaǵy úıde 10-50 azamat qana qyzmet alyp jatyr, al úlken ınternattarda – 100-300 bala bar. Árıne qyzmet sapasy jaǵynan shaǵyn úıler jaqsy. Tórtinshiden, qazir aýyl azamattaryna jalpy qyzmetter ǵana kórsetilip jatyr. Al shaǵyn úılerde memleket tarapynan kepildendirilgen barlyq qyzmetter kórsetiledi. Besinshiden, shaǵyn mekemelerge tapsyrys berý jergilikti bıýdjetke de óte tıimdi», - dep túsindirdi Eńbek mınıstri.

Foto: gov.kz

Jańalyqtar

Úrdis

MURAǴAT