Sońǵy tórt jylda elimizde túrli apattar saldarynan  9  myń adam zardap shekken
2021 jylǵy 6 jeltoqsan 16:28

Sońǵy tórt jylda elimizde túrli apattar saldarynan 9 myń adam zardap shekken

NUR-SULTAN. QazAqparat - Sońǵy tórt jylda elimizde tótenshe jaǵdaı, tabıǵı jáne tehnogendik sıpattaǵy oqıǵalar saldarynan 9 047 adam zardap shekti. Bul týraly Májilis tóraǵasynyń orynbasary, depýtat Balaım Kesebaeva málim etti, dep habarlaıdy QazAqparat tilshisi.

«Ókinishke qaraı, dúleı apattar jyl saıyn álemde qanshama adamyń ómirin alyp, densaýlyqtary men kúndelikti tirligine áser etýde. Qazaqstan da tótenshe jaǵdaılardyń týyndaýynyń, olardyń áleýmettik salaǵa jáne qorshaǵan ortaǵa teris áseriniń jalpy álemdik zańdylyqtarynan tys qala almaıdy. Qorshaǵan ortaǵa antropogendik áserdiń joǵarylaýy jáne eldiń belsendi ındýstrııalyq damýyna baılanysty teris faktorlar tehnogendik tótenshe jaǵdaılardyń týyndaýyna alyp keledi. Tek sońǵy 4 jylda respýblıka aýmaǵynda 56 783 tótenshe jaǵdaı men tabıǵı jáne tehnogendik sıpattaǵy oqıǵalar tirkeldi. Olardyń saldarynan 9 047 adam zardap shekti, onyń ishinde 2 875 adam qaza tapty. Materıaldyq zalal 19,4 mlrd teńgeni qurady», - dedi B. Kesebaeva Májilistegi «Azamattyq qorǵaý júıesin damytý týraly» taqyrybyndaǵy Úkimet saǵatynda.

Onyń aıtýynsha, atalǵan jaǵdaılarda azamattarymyz óz qaıǵy-qasiretimen jalǵyz qalǵan joq. Memleket zardap shekken halyqqa qoldaý kórsetý jáne tótenshe jaǵdaılardyń saldaryn joıý máselelerine erekshe kóńil bóledi. Bul úshin Úkimet pen jergilikti atqarýshy organdardyń rezervterinde jyl saıyn qarjylaı qarajat kózdelip, memlekettik materıaldyq rezervtiń resýrstary paıdalanylady.

«Mundaı jaǵdaılarda azamattyq qorǵaý júıesin odan ári damytý halyqtyń qaýipsizdigin jáne eldiń ekonomıkalyq áleýetin qamtamasyz etýdiń asa mańyzdy sharty bolyp sanalady. Sonymen birge, planetamyzdaǵy klımattyń jahandyq ózgerýi azamattyq qorǵaýdyń memlekettik júıesiniń jumys isteý qaǵıdattary men tetikterin zaman talabyna sáıkes qaıta qaraý qajettiligin týdyrady. Budan basqa, azamattyq qorǵaý salasyndaǵy problemalar tótenshe jaǵdaılardyń aldyn alý jáne olardyń saldaryn joıý jónindegi tıimdi qyzmetti qıyndatady», - dedi depýtat.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT