FÝTBOLDAN ÁLEM ChEMPIONATY-2022
  Jańalyqtar  >

Sońǵy eki kúnde Reseıden kelgen mıgranttar sany edáýir tómendeı bastady - Úkimet

2022 jylǵy 1 qazan, 14:21
Sońǵy eki kúnde Reseıden kelgen mıgranttar sany edáýir tómendeı bastady - Úkimet

ASTANA. QazAqparat - Búgin Qazaqstan Premer-Mınıstri Álıhan Smaıylov kóshi-qonnyń ózekti máseleleri boıynsha keńes ótkizdi, dep habarlaıdy QazAqparat.

Іshki ister mınıstri Marat Ahmetjanov 21-28 qyrkúıek aralyǵynda Reseı Federatsııasynan el aýmaǵyna kelgen mıgranttar qatarynyń ádettegiden 2-3 ese kóbeıgenin aıtqan.

Úkimet baspasóz qyzmetiniń málimetinshe, tek sońǵy eki kúnde bul elden kelýshiler sany edáýir tómendeı bastaǵan.

Esepti kezeńde Reseı Federatsııasynyń 382 azamaty turaqty turý úshin jáne 64 azamaty QR azamattyǵyn alýǵa qujat tapsyrǵan.

Mınıstrdiń aıtýynsha, búgingi kúni elimizdegi krımınogendik jaǵdaı turaqty. Mıgranttar tarapynan Qazaqstan azamattaryna qatysty jasalǵan qylmystar tirkelmegen.

Sonymen qatar ІІM sheteldik azamattardyń qoǵamdyq qaýipsizdigin jáne zańdylyǵyn qamtamasyz etýdi baqylaýdy kúsheıtti, atap aıtqanda, adamdar kóp shoǵyrlanatyn jerlerde polıtsııa narıadtarynyń sany artty.

QR Ulttyq qaýipsizdik komıteti tóraǵasynyń orynbasary – Shekara qyzmetiniń dırektory Erlan Aldajumanov tıisti ınfraqurylymy bar ótkizý pýnktterinde Qazaqstan azamattary, júk kóligi jáne sheteldikter úshin jeke jol jolaqtary bólingenin habarlady.

«Qazirgi kezde Qazaqstan azamattaryna shekaradan ótýde problemalar joq», — dedi ol.

Premer-Mınıstr jekelegen ótkizý pýnktterinde áli de bolsa uzyn-sonar kezek baryn aıtty.

«Reseıdiń shekara qyzmetimen ózara is-qımyldy kúsheıtý kerek, eki jaqtan da adamdar jınalyp qalmaýy úshin biryńǵaı algorıtm ázirleý qajet. Sebebi, bul bıznes pen halyqtyń oryndy narazylyǵyn týdyrady», — dedi Álıhan Smaıylov.

Sondaı-aq Álıhan Smaıylov turǵyn úıdi jalǵa alý kezinde azamattardyń quqyqtaryn túsindirý jumystaryn kúsheıtýdi tapsyrdy.

«Bul mıgranttardyń aǵynyna ǵana qatysty emes, jalpy azamattarymyz óz quqyqtaryn bilýi kerek. Egov nemese kóp qoldanylatyn qosymshalar arqyly taraptardyń quqyqtary men mindetterin kórsetetin tıptik jalǵa alý shartyna tsıfrlyq túrde qol qoıýǵa bolatyndaı etip jasaý qajet. Bul eki jaqtyń da quqyǵyn qorǵaýǵa múmkindik beredi», — dedi Álıhan Smaıylov.

Keńesti qorytyndylaı kele, Premer-Mınıstr memlekettik organdar men ákimdikterge kóshi-qon jaǵdaıyn retteý boıynsha keshendi jáne tıimdi sharalar qabyldaý qajettigin atap ótti.

«Birinshi kezekte qazaqstandyq azamattar úshin turaqty «jasyl dálizdi», sondaı-aq tirkelmegen mıgranttardy anyqtaý úshin mobıldi monıtorıngtik toptardyń jumysyn qamtamasyz etý qajet», — dedi Álıhan Smaıylov.


Foto: primeminister.kz


Tegı:
Uqsas jańalyqtar
Seriktester jańalyqtary

Jańalyqtar