Sońǵy 15 jylda «ArselorMıttal Temirtaý» zaýyttarynda 100-den astam jumysshy qaza tapqan
2022 jylǵy 22 maýsym 01:01

Sońǵy 15 jylda «ArselorMıttal Temirtaý» zaýyttarynda 100-den astam jumysshy qaza tapqan

QARAǴANDY. QazAqparat - «ArselorMıttal Temirtaý» AQ óndiristi jańǵyrtýǵa jetkilikti qarajat jumsamaıdy. Búgingi brıfıngte Qaraǵandy oblysy ákiminiń orynbasary Vadım Basın osylaı málimdedi, dep habarlaıdy QazAqparat tilshisi.

Ónerkásiptik alpaýyt kásiporyndarda osy aıda 5 adam qaıtys boldy. Sondaı-aq, ótken jyldyń qarasha aıynda «Abaı» shahtasynda 6 kenshiniń qazasy boıynsha tergeý jalǵasyp jatyr.

Kásiporyndardy jańǵyrtý kemshilikteri týraly oblys ákiminiń orynbasary jáne 30 jyldan astam ýaqyt osy kompanııada jumys istegen Vadım Basın aıtyp berdi.

«Dál osy jabdyqtardy aýystyrýǵa, jańǵyrtýǵa, park resýrsynda óz jumys oryndap bolǵan jabdyqty paıdalanýdan shyǵarýǵa ınvestıtsııa óte az quıylady. Sońǵy 3 jylda ınvestıtsııa orta eseppen 100 mıllıard teńgeni qurady. Biraq kombınattyń kólemin, onyń quramyn eskere otyryp, bul jerdegi zaýyttardy qosa alǵanda 8 shahtanyń kómir departamenti jáne 4 kenishi bar ken departamentin eskersek, búgingi problemalarymyzdy sheshýge bul jetkiliksiz», - dedi Vadım Basın.

Statıstıka boıynsha, sońǵy 15 jylda «ArselorMıttal Temirtaý» kásiporyndarynda 100-den astam adam qaza tapqan. Tek osy aıda 5 adam qaıtys boldy.

Esterińizge sala keteıik, «Qurylysmet» JShS aýmaǵynda «ArselorMıttal Temirtaý» AQ qyzmetkerleri qaıǵyly jaǵdaıǵa ushyraǵan bolatyn.

Otqa tózimdi qurylysty bólshekteý kezinde tsehtyń jumys istemeıtin №9 termııalyq peshiniń tóbesi qulady. Úıindi astynda bes adam qalyp qoıdy.

Onyń tórteýi qaıtys boldy, 1994 jyly týǵan taǵy bir jumysker aýrýhanaǵa jetkizildi.

Atalǵan fakti boıynsha Qylmystyq kodekstiń 277-baby 3-bóligi boıynsha qylmystyq is qozǵaldy.

Metallýrgııa kombınatyndaǵy jazataıym oqıǵa faktisi boıynsha «ArselorMıttal Temirtaý» kompanııasy bólimsheleriniń 2 basshysy qamaýǵa alyndy .

Qaraǵandy oblysynda jyl saıyn kásiptik aýrýlar saldarynan múgedektik alǵan adamdar sany ósýde. Tek bıylǵy jyldyń birinshi toqsanynda ótken jylmen salystyrǵanda kórsetkish 3 ese ósti.

Qazir óńirde óndiristerde densaýlyǵyn joǵaltqan 7 myńǵa jýyq adam bar. Onyń úshten biri jumys ornynda jaraqat alǵan.


Seriktester jańalyqtary

Jańalyqtar

Úrdis

MURAǴAT