Sońǵy 10 jylda esirtkige táýeldi adam sany 22 paıyzǵa ósken - BUU
2022 jylǵy 27 mamyr 15:10

Sońǵy 10 jylda esirtkige táýeldi adam sany 22 paıyzǵa ósken - BUU

NUR-SULTAN. QazAqparat - Búgin Premer-Mınıstrdiń orynbasary Eraly Toǵjanovtyń tóraǵalyǵymen nashaqorlyqqa qarsy kúres máselelerine arnalǵan keńes ótti. Oǵan múddeli memlekettik organ ókilderi, jýrnalıster men úkimettik emes uıym músheleri qatysty, dep habarlaıdy QazAqparat.

COVID-19 taralýyna jol bermeý jónindegi VAK málimetinshe, Birikken ulttar uıymy sońǵy 10 jylda esirtkige táýeldi adamdardyń sany 22 paıyzǵa óskenin aıtyp, dabyl qaqqan.

Álemde shamamen 275 mıllıon nashaqor bar. Esirtki jyl saıyn 500 myńnan astam adamnyń ólimine sebepshi bolyp otyr.

E. Toǵjanov 19 mln halqy bar Qazaqstan úshin esirtkige táýeldiliktiń tipti eleýsiz kórsetkishteriniń ózi ulttyq qaýipsizdikke aıtarlyqtaı qaterli ekenin atap ótip, elde atqarylyp jatqan is-sharalar barysyn baıandady.

11 mamyrda Esirtki qylmysyna qarsy is-qımyl jáne nashaqorlyqtyń aldyn alý sharalaryn jetildirý jónindegi 2022-2023 jyldarǵa arnalǵan jol kartasy bekitildi.

Atalǵan qujatta jasóspirimder men jastar arasyndaǵy nashaqorlyqtyń aldyn alý máselesi boıynsha jergilikti atqarýshy organdardyń róli kúsheıtildi.

Úkimettik emes uıymdar men eriktilerdiń atalǵan kartany júzege asyrýǵa qatysýy qarastyrylǵan.

Sonymen qatar esirtkige táýeldilerdiń profılaktıkasyna, olardy emdeýge jáne ońaltýǵa erekshe kóńil bólingen.

1987 jyly Birikken ulttar uıymy Bas Assambleıasynyń sheshimimen 26 maýsym - Halyqaralyq nashaqorlyqqa qarsy kúres kúni dep belgilengen.

Búginnen bastap elde jahandyq qaterdiń aldyn alý aılyǵy bastaldy.

E. Toǵjanov nashaqorlyq pen esirtki bıznesine qarsy is-qımyl júıesindegi eń basty element profılaktıka ekenin aıtyp, bir aı boıy - 26 maýsymǵa deıin búkil el boıynsha ár jasóspirimge jáne olardyń ata-anasyna esirtkiniń zııanyn túsindirý jumysyn jáne keń aýqymdy profılaktıkalyq is-sharalar ótkizý úshin respýblıkalyq jáne jergilikti deńgeıde barlyq memlekettik organdarǵa tapsyrma berdi.

«Bizdiń aldymyzda jastardyń boıynda salaýatty ómir salty, otbasylyq qundylyqtar jáne tabysty bolashaq qurý prıntsıpterin qalyptastyrý mindeti tur. Bul - úlken jaýapkershilik», - dedi vıtse-premer.

Keńes sońynda E. Toǵjanov óskeleń urpaqtyń bolashaǵy úshin jumys isteýge erikti túrde qatysyp otyrǵan belsendi azamattyq ustanymy bar jastar uıymdarynyń kóshbasshylaryna, blogerlerge, jýrnalısterge alǵys aıtyp, adam taǵdyryn jamandyqtan arashalap qalýǵa baǵyttalǵan qyzmetin erekshe atap ótti.


Uqsas jańalyqtar

Jańalyqtar

MURAǴAT