Soltústik Koreıa taǵy da ballıstıkalyq zymyrandar ushyrdy

2022 jylǵy 6 qazan, 14:52
Soltústik Koreıa taǵy da ballıstıkalyq zymyrandar ushyrdy

ASTANA. QazAqparat – Soltústik Koreıa Japon teńizine qaraı taǵy eki ballıstıkalyq zymyran ushyrdy. KHDR SІM málimdegendeı, Phenıan AQSh pen onyń odaqtastarynyń Koreı túbegi aımaǵyndaǵy áreketterine baılanysty óz qaýipsizdigin qamtamasyz etý úshin qajetti sharalardy qabyldap jatyr, dep habarlaıdy QazAqparat Euronews-ke silteme jasap.

Sońǵy kúnderi Soltústik Koreıanyń zymyran ushyrýynan keıin aımaqtaǵy jaǵdaı ýshyǵyp ketti. BUU Qaýipsizdik Keńesiniń shuǵyl otyrysynda AQSh-tyń turaqty ókili Lında Tomas-Grınfıld Phenıanǵa qatysty sanktsııa rejımin kúsheıtýge shaqyrdy.

«Biz BUU-ǵa múshe barlyq memleketti, ásirese Qaýipsizdik keńesiniń múshelerin aqylǵa syımaıtyn osy áreketti aıyptaýǵa qosylýǵa jáne KHDR-dy óziniń zańsyz qarý-jaraq baǵdarlamalarynan tolyq, tekseriletin jáne qaıtymsyz túrde bas tartýǵa, sondaı-aq ıadrolyq qarýsyzdandyrý baǵytynda dıplomatııany qoldanýǵa shaqyramyz», - dedi BUU janyndaǵy AQSh-tyń turaqty ókili Lında Tomas-Grınfıld.

Soǵan qaramastan Qaýipsizdik keńesiniń otyrysy nátıjesiz aıaqtaldy. Reseı men Qytaı AQSh-tyń málimdemesine jaýap retinde Vashıngtondy aımaqtaǵy teketiresti kúsheıtpeı, kerisinshe bitimgershilik jolyna túsýge shaqyrdy.

Buǵan deıin habarlanǵandaı, sońǵy 5 jyl ishinde alǵash ret 4 qazan kúni Soltústik Koreıa Japonııa aýmaǵy ústinen ballıstıkalyq zymyran ushyrdy. Japonııa bıligi soltústik-shyǵys aımaqtardyń turǵyndaryn ýaqytsha evakýatsııalaýǵa jáne poıyzdardyń jumysyn toqtatýǵa májbúr boldy.

«KHDR-diń ballıstıkalyq zymyrandaryn ushyrýy aımaqtaǵy turaqsyzdyqtyń ósýine ákelýi múmkin», - dep atap ótti BUU Qaýipsizdik Keńesiniń otyrysynda BUU Bas hatshysynyń Taıaý Shyǵys, Azııa jáne Tynyq muhıty boıynsha kómekshisi Haled Hıarı.


Foto:euronews.com




Tegı:
Álem   Koreıa  
Seriktester jańalyqtary

Jańalyqtar