SQO turǵyndarynda 13 myńnan astam tirkelgen qarý bar

PETROPAVL. QazAqparat – Soltústik Qazaqstan oblysynda 13 598 qarý tirkelgen. Qarý ıelerin polıtseıler únemi tekserip otyrady, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, qarýy bar azamattar ýchaskelik polıtsııa ınspektorlarynyń únemi baqylaýynda. Bul qarýly qylmystyń aldyn alý úshin jasalady. Qarý-jaraqty tirkep qana qoımaı, ony belgili bir tártip boıynsha saqtaý kerek.

«Qarýdy belgilengen úlgidegi seıfte saqtaý kerek: qabyrǵalarynyń qalyńdyǵy keminde 3 mm jáne edenge nemese qabyrǵaǵa myqtap bekitilýi tıis. Mundaı seıfte qarý men onyń oq-dárilerinen basqa aqsha, qundy zattar men qujattardy saqtaýǵa bolmaıdy. Oblys ortalyǵynyń turǵyndary mindetti túrde sıgnalızatsııa ornatýlary tıis. Jyl basynan azamattyq jáne qyzmettik qarýdy alý, saqtaý nemese tasymaldaý erejelerin buzǵan 544 adam anyqtaldy. Sondaı-aq, 246 qarýdy qaıta tirkeý merzimderin buzý faktileri boldy. Ár qarýǵa ruqsat bes jyl saıyn jańartylýy kerek. Bul qyzmet «elektrondy úkimet portaly» arqyly kórsetiledi. Biz barlyq azamattyq qarý ıelerin osy protsedýrany buzbas úshin ýaqytynda oryndaýǵa shaqyramyz», - deıdi SQO PD Ákimshilik polıtsııa basqarmasy azamattyq jáne qyzmettik qarý aınalymyn baqylaý bóliminiń erekshe tapsyrmalar jónindegi aǵa ınspektory Qurman Mýsın.

Onyń aıtýynsha, qarý-jaraq saqtaý erejelerin buzý faktileri kóbinese reıd barysynda anyqtalady. Jalpy, jyl basynan beri qarý ıeleri 851 zań buzýshylyqqa jol bergen. Azamattyq jáne qyzmettik qarý aınalymyn baqylaý bólinisteriniń qyzmetkerleri men ýchaskelik ınspektorlar zańsyz saqtalǵan 61 qarýdy tárkiledi.

Búginde SQO-da 13598 qarý tirkelgen.