SQO-nyń 11 aýdanynda aramshópke qatysty karantın aımaqtary bekitildi
2022 jylǵy 16 mamyr 22:10

SQO-nyń 11 aýdanynda aramshópke qatysty karantın aımaqtary bekitildi

PETROPAVL. QazAqparat – Soltústik Qazaqstan oblysynyń 11 aýdanynda jataǵan ýkekire aramshóbiniń kóptep taralýyna baılanysty karantın aımaqtary bekitildi, dep habarlaıdy QazAqparat tilshisi.

Bul týraly normatıvti-quqyqtyq aktiler saıtynda jarııalandy.

Qujatqa sáıkes Aıyrtaý, Aqjar, Aqqaıyń, Jambyl, Maǵjan Jumabaev, Kyzyljar, Ǵabıt Músirepov, Taıynsha, Tımırıazev, Ýálıhanov, Shal aqyn aýdandarynda karantın rejımi engizile otyra karantındi aımaqtar bekitildi.

Oǵan jataǵan ýkekire aramshóbiniń kóptep taralýy sebep bolǵan. Zııandy shóp shamamen 126 myń ga alqapqa jaıylǵan.

Sonyń ishinde tek Aqjar aýdanynda ǵana 53 716 ga karantın aımaǵyna kirdi.

Jataǵan ýkekire - ońaılyqpen joıylmaıtyn aramshóptiń biri, tamyry myqty keletin ol topyraqty qurǵatady, daqyldarmen salystyrǵanda 2-5 ese kóp qorek pen ylǵal sińiredi.

Ýkekire jaıylymdardyń ónimdiligin kúrt tómendetedi, jemshóp sapasyn nasharlatady.

Qurǵaqshylyq jyldary ónim shyǵymdylyǵy 60-70 %-ǵa tómendeıdi eken.

Tamyry topyraqta 3 jylǵa deıin, tuqymy 5 jylǵa deıin saqtalady. Aramshóp úı janýarlaryna, sonyń ishinde jylqy malyna da óte zııandy.

Tájirıbeli dıqan Jomart Omarovtyń aıtýynsha, buryn jataǵan ýkekire belgili bir alqapta anyqtalǵan jaǵdaıda ony qorshap tastap, mehanıkalyq jolmen joıýǵa tyrysady eken.

«Óz basym bul aramshóppen kúresip kórgen joqpyn, oǵan jetkize kórmesin. Óıtkeni, estýimshe óte zııandy jáne odan 30 jyldap qutyla almaǵandar bar. Bul aramshóp bizge shetten kelýi múmkin, óıtkeni keıbir sharýashylyqtar alǵan tuqymdaryn teksermeıdi, kimnen bolsa sodan alyp sebedi. Al onyń zardaby orasan. Eger jataǵan ýkekire boıynsha karantın engiziletin bolsa, keıin basqa memleketter bizdiń ónimdi almaı qoıýy múmkin. Bıdaıdyń sapasyna áser etedi, ónimdiligi azaıady», - deıdi Jomart Omarov.

«Respýblıkalyq fıtosanıtarlyq dıagnostıka jáne boljamdar ádistemelik ortalyǵy» RMM SQO fılıalynyń málimetinshe, jataǵan ýkekireniń tamyry 10 metrge deıin barady.

Shoq bolyp ósip, bıiktigi 20-70 sm-ge deıin jetetin aramshóp.

SQO-da jyl saıyn karantındik ósimdikke qatysty monıtorıng júrgiziledi. Qazirgi ýaqytta ol 247 995 ga aýmaqta kezdesedi. Al naqty zaqymdanǵan alqap – 192 ga.

«Aramshóp ósken 192 ga alqaptyń 191 ga aýyl sharýashylyǵy daqyldary ósedi, qalǵanyn jol alyp jatyr. Ótken jylmen salystyrǵanda ýkekire ósken aýmaq 3,7 ga azaıǵan. Byltyr aramshóp ósken alqaptar hımııalyq óńdeýden ótti. Ázirge ol oryndarda zııandy ósimdik shyqqan joq. Karantındik ósimdik bolǵandyqtan ol jaıylǵan alqap úsh jyl baqylaýǵa alynady. Osy aralyqta qaıtyp shyqpasa, alqaptan shekteý alynyp tasatalady», - delingen fılıaldyń Qazaqparat tilshisine bergen jaýabynda.


Jańalyqtar

MURAǴAT