SQO kásipkeri 15 mln teńgesin telefon alaıaǵyna berip qoıdy
2022 jylǵy 17 tamyz 23:08

SQO kásipkeri 15 mln teńgesin telefon alaıaǵyna berip qoıdy

PETROPAVL. QazAqparat – Soltústik Qazaqstan oblysynda kásipker telefonmen habarlasqan alaıaqtyń sózine senip, 15 mln teńgesin belgisiz shotqa aýdaryp jibergen, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, óńirdegi aýylsharýashylyq kásiporyndary biriniń basshysy polıtsııaǵa ınternet-alaıaqtardan zardap shekkendigi týraly aryzben júgindi. Oǵan tamyz aıynyń basynda belgisiz bireý qońyraý shalyp, ózin banktiń qaýipsizdik qyzmetkeri retinde tanystyrǵan. Onyń atyna bireýlerdiń iri kólemde nesıe resimdeýge áreket jasap jatqany týraly jáne buǵan jol bermeý úshin barlyq qarajatty «qaýipsiz shotqa» aýdarý qajettigi týraly aıtqan.

Alaıaqtarǵa sengen jábirlenýshi óz depozıtinen 15 mln teńgeni alyp, olardyń kórsetken shotyna aýdarǵan. Alaıaqtarǵa jem bolǵanyn kesh túsingen. Aıtýynsha, telefonmen sóılesken adam ózin senimdi ustaǵan, kásibı termınderdi qoldana otyra saýatty sóılegen.

«Atalǵan fakti QR Qylmystyq kodeksiniń 190-baby 4-bóligi «Alaıaqtyq» boıynsha Sotqa deıingi tergep-tekserýlerdiń biryńǵaı tizilimine engizildi. Internet-alaıaqtyqty ashý kezinde kóptegen qıyndyqtar kezdesedi. Kóp jaǵdaıda jelidegi alaıaqtar basqa memleketterde, basqa óńirlerde turady. Basty keńes: «bankten qońyraý shalǵandarǵa» senbeý, olarmen sóılesýdi toqtatý qajet. Eger de óz qarajatyńyzǵa qatysty kúmánińiz bolsa, bank bólimshesine baryńyz. Ótiriktiń betin ashý úshin qylmyskerler ataǵan uıymǵa resmı nómirleri boıynsha habarlasyńyz. Ózińizdiń qupııa jáne qarjy málimetterińizdi, paroldi, sms boıynsha kelgen cvv- jáne pın-kodty eshkimge aıtpańyz», - deıdi SQO PD bastyǵynyń orynbasary Rýslan Nazarov.

SQO-da 7 aı ishinde «bankten qońyraý shalý» arqyly 129 ınternet-alaıaqtyq tirkeldi. Polıtseıler bul alaıaqtar qoldanatyn asa qaýipti tásil ekenin atap ótti, saldarynan jábirlenýshiler 100 myńnan mıllıondaǵan teńgege deıin shyǵyn shegedi eken.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT