SQO dıqandary 4,6 mln tonna astyqty qambaǵa quıdy

2022 jylǵy 6 qazan, 15:04
SQO dıqandary 4,6 mln tonna astyqty qambaǵa quıdy

PETROPAVL. QazAqparat – Soltústik Qazaqstan oblysynda dıqandar ár gektardan ortasha 15 tsentnerden ónim alyp, 4,6 mln tonna astyqty jınap aldy, dep habarlaıdy QazAqparat tilshisi.

SQO aýyl sharýashylyǵy jáne jer qatynastary basqarmasy egin oraǵy naýqanynyń barysynan qulaǵdar etti. Bıyl óńir dıqandary 4,4 mln ga dándi daqyl, kókónis ekken edi. Ótken jylmen salystyrǵanda bıyl dándi-daqyl shyǵymy jaman emes, ortasha ár gektardan 15 tsentnerden alyndy, byltyr osy ýaqytta gektar berekeliligi shamamen 11 tsentner bolǵan.

«Dándi-burshaqty daqyldy jınap alǵanmen, maıly daqyldar áli orylyp jatyr. Bar alqaptyń 60,6 % jınaldy. Ár ga orta eseppen 7,6 tsentnerden alynyp jatyr. Bul byltyrǵy kórsetkish shamasynda. Sondaı-aq birer kúnde kartopty tolyq jınap alamyz. Qazirgi ýaqytta 366 myń tonna kartop aldyq, ár ga 120,6 tsenterden jınap jatyrmyz. Kartoptyń bıyl shyǵymy az. Byltyr gektarynan 134 tsentner aldyq. Kókónister alqabynyń 90,6 % jınaldy», - deıdi SQO aýyl sharýashylyǵy jáne jer qatynastary basqarmasynyń basshysy Meıram Meńdibaev.

Óńirde jınalǵan astyqty saqtaıtyn qoıma jetkilikti. Jalpy kólemi 6,6 mln tonna bolatyn elevator, astyq qoımalary bar.

«Qazirgi ýaqytta lıtsenzııalanǵan astyq qabyldaý kásiporyndaryna 1,2 mln tonna astyq tústi, onyń ishinde bıdaı 896,6 myń tonna, arpa 149,2 myń tonna, burshaq daqyldary 36,7 myń tonna, maıly daqyldar 78,9 myń tonna jáne 16,5 myń tonna basqa daqyldar. Jetkizilgen astyqtyń 81 % - 3-klasty bıdaı», - deıdi Meıram Meńdibaev.

Mamannyń aıtýynsha, Azyq-túlik korporatsııasy 29,5 mlrd teńgege 425 myń tonna mólsherinde astyqty forvardtyq tásilmen satyp alýǵa kelisimshart jasady.

Buǵan deıin «Azyq-túlik korporatsııasy» UQ» AQ bıylǵy astyqty satyp alý baǵasyn belgilegenin aıtqan edik.


Uqsas jańalyqtar
Seriktester jańalyqtary

Jańalyqtar