SQO-da jyl basynan beri 762 júrgizýshi kólik basqarý quqyǵynan aıyryldy

2022 jylǵy 26 qyrkúıek, 14:17
SQO-da jyl basynan beri 762 júrgizýshi kólik basqarý quqyǵynan aıyryldy

PETROPAVL. QazAqparat – Soltústik Qazaqstan oblysynda mas kúıde kólik aıdaǵany úshin 762 adam kólik basqarý quqynan aıyryldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, «Jol-kólik oqıǵalaryn toqtataıyq» aktsııasy barysynda túski ýaqytta Petropavldaǵy Abaı kóshesinde Volkswagen Jetta avtokóligi toqtatyldy. Rýlde spırttik ishimdikke masaıǵan kúıde 36 jastaǵy qala turǵyny bolǵan.

Tekserý barysynda kólik onyń janynda otyrǵan 37 jastaǵy dosynyń atyna tirkelgendigi anyqtaldy. Eki er adam Ákimshilik quqyq buzýshylyq týraly Kodekstiń 608-baby boıynsha jaýapkershilikke tartyldy: bireýi mas kúıinde kólikti basqarǵany úshin, ekinshisi – kólik tizginin mas kúıdegi adamǵa bergeni úshin.

Sot sheshimimen olar 15 táýlikke ákimshilik qamaýǵa alyndy, sonymen qatar 7 jylǵa kólik júrgizý quqyǵynan aıyryldy.

«Mas kúıde kólik tizgindeıtin júrgizýshiler óz ómirlerin ǵana emes, aınalasyndaǵy jol qozǵalysynyń basqa da qatysýshylarynyń ómirin qaýipke tigedi. Jol qaýipsizdigi boıynsha aktsııalar men reıdtik is-sharalar kezinde jol júrisi qaǵıdalaryn óreskel buzý faktilerin, onyń ishinde kólikti mas kúıde basqarý derekterin anyqtaýǵa basa nazar aýdarady. Jyl basynan oblysta mas kúıde rýlge otyrǵan 762 júrgizýshi kólik basqarý quqyǵynan aıyryldy. Jol qozǵalysynyń barlyq qatysýshylaryna aıtarymyz: mas júrgizýshi – qaýipti qylmysker. Jyl basynan oblys joldarynda mas júrgizýshilerdiń kinásinen 16 jol-kólik oqıǵasy oryn aldy, onda 6 adam qaza taýyp, 14 adam jaraqat aldy», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.


Uqsas jańalyqtar
Seriktester jańalyqtary

Jańalyqtar