Jańalyqtar  >
  Qoǵam
SQO-da jumyssyz jastar sany kóbeıgen
2022 jylǵy 14 tamyz 01:30

SQO-da jumyssyz jastar sany kóbeıgen

PETROPAVL. QazAqparat – Soltústik Qazaqstan oblysynda 7 aı ishinde jastar arasyndaǵy jumyssyzdyq deńgeıi 2,9 paıyzdan 3,9 paıyzǵa deıin ósken. Bul týraly atalǵan óńirge jumys saparymen barǵan Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy QazAqparat tilshisi.

Mınıstrdiń aıtýynsha, bıylǵy jartyjyldyqta Soltústik Qazaqstan oblysyndaǵy jaldamaly jumyskerler sany 9,5 myń adamǵa azaıǵan. Al ózin-ózi jumyspen qamtyǵan azamattar 5,2 myń adamǵa qysqarypty. Degenmen bul rette jastar arasyndaǵy jumyssyzdyq deńgeıi 2,9 paıyzdan 3,9 paıyzǵa ósken.

«7 aıda Soltústik Qazaqstan oblysynda 9 548 adam jumysqa ornalasty. Onyń ishinde jumyspen qamtý ortalyqtary arqyly 5 928 adam qyzmetpen qamtyldy. Bul oraıda, óńirde ulttyq jobalar sheńberinde jumys oryndaryn qurý kórsetkishi tómen. Bıyl tek 596 jumys orny ashylǵan. Qyzyljar jáne Taıynsha aýdandarynda bul jumys múldem júrgizilmedi. Esil, Aıyrtaý jáne Shal aqyn aýdandarynda kórsetkish óte tómen», - dedi mınıstr.

Sonymen qatar, óńirde jumysqa ornalasqan azamattarǵa mindetti zeınetaqy aýdarymdaryn tóleý kórsetkishi tómen. Atap aıtqanda, Soltústik Qazaqstan oblysynda bul meje 59 paıyz deńgeıinde. Aımaqtaǵy eń tómengi kórsetkish Mamlıýt (37%) jáne Qyzyljar (38,2%) aýdandarynda tirkelgen. Mınıstr sózinshe, Ulttyq jobalar sheńberinde Maǵjan Jumabaev, Mamlıýt jáne Ýálıhanov aýdandarynda jumysqa ornalasqandardyń birde-bireýi zeınetaqy jarnalaryn aýdarmaǵan.

Sondaı-aq, Tamara Dúısenova Otbasynyń tsıfrlyq kartasyn ázirleý boıynsha júrgizilip jatqan jumystarǵa toqtaldy.

«Alǵashqy nátıjelerge sáıkes, Soltústik Qazaqstan oblysynda 208 myńnan astam otbasy bar. Olardyń 99,6 myńnan astamynda turmys jaǵdaıy óte nashar. Mundaı otbasylar 1 qyrkúıekten bastap ózderine tıisti memleket tarapynan kórsetiletin kómek týraly sms-habarlamalar alatyn bolady», dep atap ótti vedomstvo basshysy.

Budan ózge, mınıstr jergilikti atqarýshy bılik organdaryna múgedektigi bar adamdardy qoldaý máselelerin sheshýdi tapsyrdy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT