SQO-da jańa bıznes bastamalarǵa byltyr 680 mln teńge grant berildi
2022 jylǵy 25 maýsym 14:54

SQO-da jańa bıznes bastamalarǵa byltyr 680 mln teńge grant berildi

PETROPAVL. QazAqparat – Soltústik Qazaqstan oblysynda byltyr «Eńbek» baǵdarlamasyna 20 myńnan astam adam qatyssa, sonyń 70 %-y – aýyl turǵyny, dep habarlaıdy QazAqparat tilshisi.

Oblystyq máslıhattyń kezekti HVIII sessııasynda turǵyndardy áleýmettik qorǵaý jáne jumyspen qamtý máseleleri qaraldy. Halyqty jumyspen qamtý is-sharalary Nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan «Eńbek» memlekettik baǵdarlamasy aıasynda júrgizilgen. Osylaısha ótken bir jyl ishinde SQO-da 20 myń adam, onyń 14 myńy – aýyl turǵyndary, baǵdarlamanyń ıgiligin kórdi.

«Halyqty jumyspen qamtý ortalyqtary arqyly 11 773 adam bos oryndarǵa jumysqa turdy. Memlekettik baǵdarlama eńbek naryǵyndaǵy qajettilikti eskere otyryp, tehnıkalyq jáne kásiptik bilimi bar kadrlardy daıarlaýǵa, qysqa merzimdi kásiptik oqytýǵa, eńbek resýrstaryn qaıta daıarlaýǵa múmkindik berdi. Nátıjesinde byltyr 424 adam qaıta daıarlyqtan ótip, sonyń 303-i jumyspen qamtyldy. «Bastaý Bıznes» jobasy boıynsha kásipkerlik negizderine oqytý mindeti qoıylǵan. Nátıjesinde 887 adam kýrstan ótti. Jańa bıznes ıdeıalardy júzege asyrýǵa 1214 grant berildi, bul – 680 mln teńge shamasynda», - deıdi SQO jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Rınat Eljasov.

Mamannyń aıtýynsha, jappaı kásipkerlikti damytý aıasynda 3 mlrd teńgeniń 588 nesıesi berilgen. Al baǵdarlamanyń úshinshi baǵyty - halyqty jumyspen qamtýǵa járdemdesý jáne eńbek resýrstarynyń utqyrlyǵy arqyly eńbek naryǵyn damytý boıynsha áleýmettik jumys oryndaryna 517 adam, jastar praktıkasyna 439 adam, qoǵamdyq jumystarǵa 4009 adam, alǵashqy jumys ornyna 70 jáne «urpaqtar kelisimsharty» boıynsha 14 adam jumysqa ornalastyryldy.

Esterińizge salaıyq, buǵan deıin SQO-da bıyl 338 jasqa kásip ashýǵa jalpy somasy 430 mln teńge grant beriletinin aıtqan edik. Sondaı-aq jumyssyz júrgen 500 adam tegin alǵashqy kásipti meńgere alady.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT