SQO-da trassany qar basyp, jolaýshylary bar avtobýs jolda qala jazdady
2022 jylǵy 28 qańtar 10:06

SQO-da trassany qar basyp, jolaýshylary bar avtobýs jolda qala jazdady

PETROPAVL. QazAqparat – Soltústik Qazaqstan oblysynda jyl basynan 1200-den astam avtojol tekserilip, qys mezgilinde kútip-ustaýǵa qatysty 150-ge jýyq olqylyqty tapty, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, oıdym-oıdym shuńqyrlar, qatyp qalǵan muz ben úıilgen qar jol qozǵalysyna qaýip tóndiredi. Qysqy kezde joldyń sapasyn baqylaýmen ákimshilik polıtsııa aınalysady. Jol jáne kommýnaldyq qyzmettermen birge turaqty negizde joldy tekseredi. Olqylyqtar anyqtalǵan jaǵdaıda ony joıýǵa qatysty sharalar qabyldanady. Joldardy kútip-ustaý boıynsha talaptardy oryndamaǵan jaǵdaıda jaýapty tulǵalar QR Ákimshilik quqyq buzýshylyq týraly kodeksiniń 631-baby boıynsha jaýapqa tartylady.

Máselen, Jambyl aýdanynyń aýmaǵyndaǵy «Presnovka-Blagoveenka-Qaırankól» avtojolyndaǵy ýchaskeni qar basyp, jolaýshylar avtobýsy turyp qalǵan. Polıtsııa jáne jergilikti atqarýshy organdar qyzmetkerleri birden tıisti sharalar qoldandy. Jol qardan tazartylǵanǵa deıin avtobýs Jambyl aýdanyna jiberilip, jolaýshylarǵa ystyq tamaq berildi. Merdiger uıymnyń jolǵa jaýapty qyzmetkeri qardy ýaqtyly jınamaǵany úshin ákimshilik jaýapkershilikke tartyldy.

Sondaı-aq aýdan ortalyǵy Taıynshada jáne Esil aýdanyndaǵy aýyldardyń birinde joldy ýaqytyly qardan ashpaǵany úshin jaýapty adamdarǵa aıyppul salyndy.

«Qańtar aıy bastalǵaly 1200 km-den astam avtojolǵa 109 tekseris júrgizildi. Nátıjesinde 148 kemshilik anyqtaldy. Olardy joıý boıynsha 97 uıǵarym shyǵaryldy. Joldy tıisti kútip-ustamaǵany úshin 19 adam jaýapkershilikke tartyldy», - deıdi SQO Polıtsııa departamenti ákimshilik polıtsııa basqarmasy jol jáne tehnıkalyq ınspektsııasynyń bólim bastyǵy Nazar Baımatov.


Jańalyqtar

MURAǴAT