SQO-da sýyq tıip aýyrǵandardyń basym bóligi - balalar
2021 jylǵy 29 qarasha 14:39

SQO-da sýyq tıip aýyrǵandardyń basym bóligi - balalar

PETROPAVL. QazAqparat – Soltústik Qazaqstan oblysynda eki aıdyń ishinde 10 758 adam jiti respıratorlyq vırýstyq ınfektsııa juqtyrdy, tumaýmen aýyrǵandar joq, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, jedel respıratorlyq vırýstyq ınfektsııa juqtyrǵandar sany bir aptanyń ishinde 5 %-ǵa artty. Epıdemıologııalyq maýsym 1 qazan bastalsa, búginge deıin 10 758 adam JRVI-men dárigerge qaralǵan. Tek ótken aptada sýyq tıip aýyrǵan 1,5 myń adam emhanaǵa kelgen. Bul onyń aldyndaǵy aptamen salystyrǵanda 5 %-ǵa artyq.

Aýyrǵandardyń 685-i - 14 jasqa deıingi balalar, 379-y – 15 pen 29 jastaǵylar, 330-y – 30 ben 64 jastaǵylar, 113-i – 65 jastan asqandar.

«JRVI-men aýyrǵandar sany ótken jylmen salystyrǵanda 1,4 esege ósip otyr. Respýblıkanyń basqa óńirlerinde tumaýmen aýyrýdyń 90 jaǵdaıy tirkeldi. Sondyqtan da maskany durys kıip, áleýmettik ara qashyqtyqty saqtaý qajet. Oıyn-toılardy azaıtyp, qarapaıyp gıgıenalyq talaptardy saqtaǵan jón», - deıdi SQO sanıtarııalyq-epıdemıologııalyq baqylaý departamentiniń basshysy Áset Jumataev.

SQO-da 90 myń turǵyn tumaýǵa qarsy ekpe aldy, bul óńirdiń barlyq halqynyń 16 %-y.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT