SQO-da sporttyń birneshe túrin meńgergen kelinshek endi muzdaı sýǵa shomylýdy ádetke aınaldyrdy
2022 jylǵy 25 qańtar 20:16

SQO-da sporttyń birneshe túrin meńgergen kelinshek endi muzdaı sýǵa shomylýdy ádetke aınaldyrdy

PETROPAVL. QazAqparat – Soltústik Qazaqstan oblysynyń turǵyny Asylgúl Amangeldınova «ónerdi úıren de jıren» degen ustanymmen ómir súredi.

Sporttyń birneshe túrin jaqsy meńgergen 30 jastaǵy kelinshek búginde kerlıngten aýdandyq quramanyń múshesi. Al úsh jyldan beri muzdaı sýǵa shomylýdy ádetke aınaldyrǵan.

Salamatty ómir saltyn janyna serik etken óńir turǵynyn QazAqparat tilshisi áńgimege tartqan edi.

Kerlıng qandaı sport túri, SQO-da ol damyǵan ba?

Kerlıng Shotlandııada paıda bolǵan, bastapqyda ony fermerler oınaǵan eken. Granıt tastardy qatqan kól betine tastap, ony syrǵanatyp jarysqan. Komandalyq oıyn, tórt oıynshysy bolady. Kópshilik bul sportty túsine bermeıdi jáne bir qaraǵanda óte ońaı sııaqty kórinedi. Alaıda bul oıynda da taktıka kerek. Muz ústine jiberilgen tasty qarsy bettegi «úıge» neǵurlym jaqyndatý kerek. Al oıynshylar tastyń jolyn tazalap, syrǵýyna jaǵdaı jasaıdy. Eptilikti, dáldikti, aıla-tásildi qajet etetin sport. Olımpıadalyq oıyndar baǵdarlamasyna engizilgen. Sporttyń bul túri bizdiń oblysta sońǵy kezderi ǵana damı bastady deýge bolady. Qazir jastar arasynda keń taralyp keledi. Jaqynda jyldyń alǵashqy jarysy ótpek. Petropavlda Sennaıa bazada arnaıy muz alańymyz bar. Kerlıngke arnalǵan muz alańy erekshe ádispen quıylady, onyń ústi bórtik bolyp keledi. Men Qyzyljar aýdany qurama komandasynyń múshesimin. Nátıjemiz jaman emes, jylda júldeli oryndardy alyp júrmiz. Jalpy ózim oblystyq týrnırde qola júldeger atandym.

Jalpy sportqa qalaı jáne neshe jasyńyzda keldińiz?

Sportqa bala kezimnen áýespin. SQO Jambyl aýdanynda mektepte dene shynyqtyrý páninen Sálimbaı Erikbaıuly Sádýev degen aǵaıymyz berdi. Sol adamnyń arqasynda sporttyń barlyq túrin jaqsy meńgerdim. Qaıda, qandaı jarys bolsa, aǵaıymyz soǵan alyp baratyn. Basketboldan, voleıboldan aýdandyq jarystardy qaldyrmaımyz. Al fýtboldan aýdan quramasynda boldym. Jeńil atletıkamen aınalystym, bes asyq oınaımyn. 6-7 synypta oqyp júrgenimde eresekterdiń qatarynda sport meıramy – «Aq bıdaıǵa» qatysa bastadym. Velosıped tebemin, myltyq atý sporty da unaıdy.

Siz ekstremaldy sýǵa túsýmen de aınalysady ekensiz, qashannan beri ?Alǵash ret muzdaı sýǵa túskenińiz esińizde me, qandaı áser aldyńyz?

Muzdaı sýǵa shomylýdy úsh jyl buryn bastadym. Oǵan oıda-joqta keldim. Sol jyly qarasha-jeltoqsan aıynyń bir kúni sporttaǵy Arman degen áriptesim chellendjge qatysýǵa shaqyrdy. Men qoldaý bildirip, sol joly alǵash ret muzdy sýǵa tústim. Eń bastysy ishtegi qorqynyshty jeńe bilý qajet. Aldyn-ala daıyndyǵym bolǵan joq, biraq qazir «morj» bolǵysy keletinderge buǵan ázirlikpen kelýge keńes berer edim. Eń aldymen salqyn sýmen quıynýdan bastaý kerek. Sondaı-aq kún qatty sýymaı turǵanda, kúzde shomylýdy ádetke aınaldyrǵan durys. Qatty tońýǵa bolmaıdy. Sosyn «morjdar» mindetti túrde keminde aptasyna bir ret sýǵa shomylýy tıis. Al muzdaı sýǵa shomylǵannan alǵan áserdi sózben aıtyp jetkizgisiz. Ózińdi jeńil sezinip, boıyńdy qýanysh kerneıdi. Densaýlyqqa da paıdasy zor, ımmýnıtet kóteriledi. Men qazir ártúrli vırýstyq aýrýlarmen, tumaýmen aýyrmaımyn. Ózimdi qashanda jaqsy sezinemin. Búginde oblystaǵy «morjdar» klýbyna múshemin. Ol jerde men sııaqty qyz-kelinshekter kóp, aralarynda tipti balalar da bar.

Otbasyńyz týraly aıtsańyz...

Jaqynda, jeltoqsannyń 31-i kúni turmysqa shyqtym. SQO Ýálıhanov aýdany Kishkenekól aýylyna kelin bolyp tústim. Jarym da sportqa jaqyn, sondyqtan qyzyǵýshylyǵymyz bir. Joldasymmen tabystyrǵan da sport. Bıyl jazda Aqtaý qalasyna respýblıkalyq «Aq bıdaı» oıyndaryna baryp, sol jaqta tanystyq. Endi birer kúnde qaıyn jurtymnyń jaǵyna jumysymdy aýystyramyn, kerlıngten aýdannyń qurama komandasyna endim.

Sizdiń respýblıkalyq telearnalardyń birinde ótken ıntellektýaldyq oıyna qatysqanyńyzdy bilemiz. Osylaısha ózińizdiń bilimnen de quralaqan emes ekenińizdi kórsettińiz.

«Júzden júırik» ıntellektýaldyq oıynyna qatysýǵa shaqyrǵan habarlandyrýdy áleýmettik jeliden kórdim. Qatysý úshin 15 suraqqa jańylmaı jaýap berý kerek eken, tapsyrmany oryndap, joldama aldym. Qazaqstannyń ár jerinen kelgen eken oıynǵa qatysýǵa, bári kil myqtylar, tarıhshylar, til mamandary. Sol joly baǵdarlama el Táýelsizdiginiń 30 jyldyǵyna arnaldy. Suraqtar qıyn boldy dep aıtpaımyn, basym bóligi mektep baǵdarlamasynan alynǵan, ıaǵnı mektepte alǵan bilimim kómektesti. Negizinen eldiń tarıhyna baılanysty suraqtar qoıyldy. Ony ár azamat bilýge mindetti dep oılaımyn.

Qolyńyz bosta nemen aınalysasyz?

Shynymdy aıtsam, bos ýaqytym joq. Qańtar aıynan tamyzǵa deıin jarystar bastalady. Aýdandyq, oblystyq, bir jyldary respýblıkalyq saıystarǵa qatystym. Aptasyna eki-úsh ret voleıbol oınaımyz. Qolym bosaǵan kúnniń ózinde belsendi demalysty unatamyn.

Áńgimeńizge rahmet!


Jańalyqtar

MURAǴAT