SQO-da mamandar qaı salada jazataıym oqıǵalar kóp bolatynyn aıtty
2022 jylǵy 30 maýsym 10:07

SQO-da mamandar qaı salada jazataıym oqıǵalar kóp bolatynyn aıtty

PETROPAVL. QazAqparat – Soltústik Qazaqstan oblysynda byltyr 43 adam óndiristik jaraqat alsa, onyń 11-i qaza tapty, dep habarlaıdy QazAqparat tilshisi.

Ulttyq statıstıka bıýrosynyń SQO boıynsha departamenti baspasóz qyzmetiniń málimetinshe, byltyr óńirde jumys ornynda jazataıym oqıǵalar kezinde 43 adam zardap shekken, onyń 11-i qaza tapty. Jalpy zardap shekkenderdiń 25,6 %-y, qaza tapqandardyń 9 %-y - áıelder.

2020 jylmen salystyrǵanda óndiris ornynda jazataıym oqıǵalar kezinde zardap shekkenderdiń sany 14 %-ǵa azaıdy. Ótken jyly barlyq zardap shekkenderdiń 65,1 %-y – jeke menshik kásiporyndar men uıymdarda, 32,6 %-y – memlekettik jáne 2,3 %-y – basqa memleketterdiń menshigindegi kásiporyndarda jumys istegen.

Óndiristegi jazataıym oqıǵalar kezinde zardap shekkenderdiń árbir ekinshisi - biliktiligi joq jumysshy, zardap shekkenderdiń eń kóbi, 12 adam, aýyl, orman jáne balyq sharýashylyǵynda jumys istegen.

Óndiriste 10 jumysshynyń jaraqat alýyna óreskel abaısyzdyq, 9 adam jumystyń durys uıymdastyrylmaýynan, 5 adam kólikti paıdalaný kezinde qaýipsizdik talaptaryn buzýdan jáne 4 jumysshy eńbekti qorǵaý jáne qaýipsizdik qaǵıdalaryn buzýdan zardap shekken.

Zattardyń, materıaldardyń qulaýy, qıraýy, jerdiń opyrylýy saldarynan 9 adam jaraqat aldy, zııandy jáne qaýipti óndiristik faktorlar men zattardyń áserinen 8 adam, zardap shegýshiniń qulaýynan – 7, uıymnyń kóliginde bolǵan jol-kólik oqıǵasynda 6 adam zardap shekti.

Óndiriste jaraqat alýdan 11 adamnyń ishki aǵzalaryna zaqym keldi, 10 jumysshyda jabyq, 5 adamda ashyq synyq tirkeldi.

Óndiriste bolǵan jazataıym oqıǵalar boıynsha byltyr 17,7 mln teńgeniń materıaldyq tólemi jasaldy. Onyń 9,3 mln teńgesi birjolǵy járdemaqylar, 8,2 mln teńgesi eńbekke jaramsyzdyq paraǵy boıynsha, 0,2 mln teńge – basqa jumysqa aýystyrylǵanda burynǵy eńbekaqysyna deıingi qosymsha tólemderdiń mólsheri.


Jańalyqtar

Úrdis

MURAǴAT