SQO-da qylqan japyraqty aǵashtardy brakonerlerden qorǵaý úshin 100 mobıldi top quryldy
2021 jylǵy 3 jeltoqsan 12:33

SQO-da qylqan japyraqty aǵashtardy brakonerlerden qorǵaý úshin 100 mobıldi top quryldy

PETROPAVL. QazAqparat – Soltústik Qazaqstan oblysynda Jańa jyl merekesi qarsańynda qylqan japyraqty aǵashtardy brakonerlerden qorǵaý úshin reıdter bastaldy, dep habarlaıdy QazAqparat tilshisi.

Jańa jyl – kópshiliktiń asyǵa kútetin meıramdarynyń biri. SQO-da otbasylyq meıramǵa daıyndyq bastalyp ketti. Saýda jáne oıyn-saýyq ortalyqtary bezendirilip jatyr. Bul ýaqytta merekeniń basty nyshany - shyrshaǵa suranys artady. Elimizde qylqan japyraqty aǵashtardy kesýge tyıym salynǵan. SQO tabıǵı resýrstar jáne tabıǵat paıdalanýdy retteý basqarmasynyń málimetinshe, ormanshylar shyrshalardy ákimdikterdiń ótinishi boıynsha buqaralyq mádenı is-sharalardy ótkizýge ǵana beredi. Erkin satylymda joq. Osyǵan baılanysty basqarma ormandarda kúzetti kúsheıtti.

«Ormanshylardan 100 mobıldi top quryldy. Memlekettik orman qorynyń aýmaǵynda 19 statsıonarlyq beket qoıyldy. Baǵyttar belgilenip, kezekshilik kestesi jasaldy. 1 jeltoqsannan bastap ormanshylar polıtseılermen birge reıdterge shyǵyp jatyr. Olar turǵyndar jáne zańdy tulǵalar satyp alǵan shyrshanyń qujattaryn tekseredi», - deıdi SQO tabıǵı resýrstar jáne tabıǵat paıdalanýdy retteý basqarmasynyń bólim bastyǵy Vasılıı Labanchýk.

Qylqan japyraqty aǵashtardy zańsyz keskeni úshin jaýapkershilik kúsheıtildi. Memlekettik orman qory aýmaǵynda 1 shyrshany keskeni nemese búldirgeni úshin keminde 15 AEK, ıaǵnı 43755 teńge mólsherinde aıyppul qarastyrylǵan. Eger aǵash erekshe qorǵalatyn tabıǵı aýmaqta kesilgen bolsa, onda keltirgen zalal úshin 25 AEK - 72932 teńge aıyppul salynady.

«Eger de orman qoryna kiretin aǵashtar men butalardy keskennen 100 AEK mólsherine deıin zalal keltirilse, zańsyz kesilgen aǵashtar men butalar, kólik quraldary jáne quqyq buzýshynyń ózge de zattary tárkilenedi. Sondaı-aq jeke tulǵalarǵa 100 AEK mólsherinde aıyppul salynady», - deıdi Vasılıı Labanchýk.

SQO-da birneshe jyl qatarynan Reseıden ákelingen shyrshalar satylyp keledi. Tek satýshynyń ónimniń ımporttyq ekenin rastaıtyn qujattary bolýy tıis.


Uqsas jańalyqtar

Jańalyqtar

Úrdis

MURAǴAT