SQO-da kúıeýi áıelin atyp óltirip, keıin ózine qol jumsady
2022 jylǵy 30 maýsym 15:43

SQO-da kúıeýi áıelin atyp óltirip, keıin ózine qol jumsady

PETROPAVL. QazAqparat – Soltústik Qazaqstan oblysy Aıyrtaý aýdanynda erli-zaıypty arasyndaǵy janjal qaıǵyly aıaqtaldy. Kúıeýi áıelin atyp óltirip, keıin ózine qol jumsady, dep habarlaıdy QazAqparat tilshisi.

SQO prokýratýrasynyń málimetinshe, oqys oqıǵa 27 maýsym kúni Aıyrtaý aýdanynyń Lobanovo eldi mekeninde tańǵy saǵat 5.00 shamasynda bolǵan. Polıtsııaǵa túsken shaqyrtýdan keıin mekenjaıǵa jedel jetken tergeý toby úıden zorlyq-zombylyq belgileri bar eki máıitti tapty. Bireýi 33 jastaǵy áıeldiń, ekinshisi onyń 36 jastaǵy kúıeýiniń denesi bolyp shyqty. Qaıǵyly oqıǵa jaıynda polıtsııaǵa erli-zaıyptynyń balalary habarlaǵan bolyp shyqty. Olar janjal kezinde úıde bolǵan. Oqıǵa ornynan ańshylyq myltyq tárkilendi.

Atalǵan fakti QR QK 99-baby 2-bóligi «aýyrlatatyn mán-jaılardaǵy kisi óltirý» boıynsha sotqa deıingi tergep-tekserýlerdiń biryńǵaı tizilimine engizildi. Jetim qalǵan, kámelet jasyna tolmaǵan úsh bala Aıyrtaý aýdanynyń Saýmalkól aýylyndaǵy ómirlik qıyn jaǵdaıǵa tap bolǵan balalardy qoldaý ortalyǵyna ornalastyryldy. Oqıǵanyń negizgi nusqalarynyń biri boıynsha, 36 jastaǵy aýyl turǵyny janjal kezinde áıeline myltyq kezep, atqan. Onyń jan tapsyrǵanyn kórgennen keıin myltyqpen ózin-ózi óltirgen. Alaıda negizgi qorytyndy tergeý nátıjelerinen keıin shyǵarylady. Qylmystyq is boıynsha qajetti sot saraptamalary taǵaıyndaldy.

Іs boıynsha barlyq mán-jaılardy anyqtaýǵa baǵyttalǵan qajetti tergeý áreketteri júrgizilip jatyr. Tergeý barysyn oblys prokýratýrasy baqylaýǵa aldy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT