SQO-da kolledj túlekteriniń 81,5% memlekettik tapsyryspen daıarlandy
2022 jylǵy 25 mamyr 21:51

SQO-da kolledj túlekteriniń 81,5% memlekettik tapsyryspen daıarlandy

PETROPAVL. QazAqparat – Bıyl Soltústik Qazaqstan oblysynda kolledj bitiretin 3293 túlektiń 81,5 % memlekettik tapsyrys boıynsha daıarlandy. Endi mamandardy jumysqa ornalastyrý máselesi týyndap otyr, dep habarlaıdy QazAqparat tilshisi.

SQO bilim basqarmasynyń málimetinshe, bıyl kolledjderdi 3293 túlek bitiredi. Olardyń 81,5 % – memlekettik tapsyrys boıynsha mamandyq meńgergender. Aldyn ala júrgizilgen saýalnama olardyń 60 % astamy jumysqa ornalasatynyn kórsetken. Desek te, jas mamandardy jumysqa alýda áli kúnge sheshimin tappaǵan másele jeterlik.

«Jumys berýshiler jańa bitirgen mamannan tájirıbe bolýyn talap etedi. Aýyl sharýashylyǵynda, qyzmet kórsetý, bilim berý jáne medıtsına salalarynda jas mamandardyń eńbekaqysynyń tómendigi – olardyń jumysqa ornalaspaýynyń bir sebebi. Jumys berýshilerdi zańdy túrde oqý ornynyń túlekterin jumysqa alýǵa mindetteıtin normanyń bolmaýy jáne jumys oryndarynyń azdyǵy da kolledj túlekterine jumysqa ornalasýda qıyndyq týdyrady», - deıdi SQO bilim basqarmasy basshysynyń orynbasary Vladımır Tkachenko.

Aıta ketsek, byltyr memlekettik tapsyrys boıynsha kolledj bitirgen 2393 túlektiń 68,5 % jumysqa ornalasqan. Qalǵandary joǵary oqý oryndarynda bilimderin jalǵastyrǵan, áskerge ketken, bala kútimimen otyrǵandar bar. Tek 105 adam ǵana jumys tappaǵan.

«Byltyr kolledj bitirgen taýartanýshylar men farmatsevt kómekshileri 100 % jumysqa ornalasqan. Qurylysshy-tehnıkterdiń 98 %, dáriger kómekshisi-zerthanashylardyń 96 %, veterınarııa sanıtarlarynyń 81 %, tehnık-elektrıkterdiń 86 %, qurylys jumysynyń sheberi mamandyǵy boıynsha túlekterdiń 88 % jumys tapqan. Al dızaınerlerge suranys tómen, tek 29 %-y, teplovoz mashınıstiniń kómekshisi - 42 %, baǵdarlamashy-tehnıkter - 44 %, jol ınspektorlary – 40 % ǵana qyzmetke ornalasty. Erekshe oqý qajettiligi bar 19 adam omartashy mamandyǵyn alyp shyqty, olardyń 16-sy jumyspen qamtyldy», - deıdi Vladımır Tkachenko.

Buǵan deıin SQO-da jastarǵa kásip ashýǵa 430 mln teńge grant beriletinin aıtqan edik.


Uqsas jańalyqtar

Jańalyqtar

MURAǴAT