SQO-da ınterneti joq aýyldarda elektrondy kúndelikti toltyrýǵa tyıym salyndy

PETROPAVL. QazAqparat – Soltústik Qazaqstan oblysynyń ákimi Qumar Aqsaqalov sapaly ınterneti joq eldi mekenderdiń muǵalimderin elektrondy kúndelik toltyrýǵa májbúrleýge tyıym saldy, dep habarlaıdy QazAqparat tilshisi.

Uqsas jańalyqtar

SQO-da aýyldardy sýmen qamtýǵa bıyl 10,7 mlrd teńge bólindi

ShQO: Altaı aýdanynyń 4 eldi mekeni aýyz sýmen qamtylmaq

SQO ákimdiginiń otyrysynda tsıfrlandyrý máseleleri talqylandy. Jıyn barysynda SQO ákimi Qumar Aqsaqalov ınternet jelisi joq aýyldarda muǵalimderdi elektrondy kúndelikti májbúrleý faktileri bar ekenin aıtty. Ustazdardyń keıbiri qujatty toltyrý úshin tipti kórshi eldimekenderge barýǵa májbúr.

«Internet joq aýyldarda elektrondy kúndelikti toltyrý qısynǵa kelmeıdi. Muǵalimderdi májbúrlemeńizder. Internettiń jyldamdyǵy tómen bolǵasyn, mektepte túnde jumys isteýge týra keledi. Tipti keıbir muǵalimder kórshi aýylǵa baryp, toltyrady degendi estidim. Mundaıǵa endi jol berilmesin», - dedi Qumar Aqsaqalov.

Oblystyq bilim basqarmasynyń málimetinshe, «elektrondyq kúndelikti mindetti túrde toltyrý kerek» degen tapsyrma joq.

Qazir oblysta 519 eldi meken bolsa, sonyń 338-i ǵana joǵary jyldamdyqty ınternetpen qamtylǵan. Bul másele aldaǵy jyldary sheshimin tappaq. Máselen keler jyly 236 aýyl, 2021 jyly 196 eldi meken sapaly ınternet jelisine qosylmaq. Joǵary jyldamdyqty ınternetti tartýǵa kóp qarajat qajet. Sondyqtan bul jospar memlekettik baǵdarlamalardyń aıasynda júzege asyrylmaqshy.