SQO-da er adam «KamAZ»-dy mas kúıde basqarǵan
2021 jylǵy 29 qarasha 23:09

SQO-da er adam «KamAZ»-dy mas kúıde basqarǵan

PETROPAVL. QazAqparat – Soltústik Qazaqstan oblysynda ekskavator artyp alǵan júk kóliginiń júrgizýshisi rýlge mas otyrǵandyǵy úshin ákimshilik jaýapkershilikke tartyldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, 28 qarashada Petropavlda Mamlıýt tasjoly men Ryjov kóshesiniń qıylysynda polıtseıler qujattardy tekserý úshin ekskavator tasymaldap bara jatqan «KamAZ» kóligin toqtatqan. Júrgizýshi, 58 jastaǵy Ǵ.Músirepov atyndaǵy aýdannyń turǵyny eken. Odan spırttik ishimdiktiń ıisi shyǵyp turǵan. Polıtseıler er adamdy medıtsınalyq kýálandyrýdan ótkizdi. Kóp tonnaly aýyr júk kólikti basqarý barysynda júrgizýshiniń mas kúıde bolǵany rastaldy.

Júk kóligin tártip saqshylary arnaıy avtoturaqqa qoıdy. Júrgizýshige mas kúıinde kólik basqarǵany úshin ákimshilik materıal jınaldy, ol sheshim qabyldaý úshin sotqa berildi.

Kelesi kúni Petropavldyń mamandandyrylǵan ákimshilik soty er adamdy 15 táýlikke qamaýǵa aldy jáne 7 jylǵa kólik basqarý quqyǵynan aıyrdy. Bul quqyq buzýshylyq ótken aptada ótken «Mas júrgizýshi» jedel aldyn alý is-sharasynyń sońǵy kúni anyqtaldy.

«Mas júrgizýshi - yqtımal qylmysker. Júrgizilgen jedel aldyn alý is-sharalarynyń maqsaty osyndaı faktilerdi anyqtaý jáne jolyn kesý, jol qaýipsizdigin qamtamasyz etý. Іs-shara barysynda oblys joldarynda ishimdik ishkennen keıin rýlge otyrǵan 32 adam jaýapkershilikke tartyldy. Olarǵa zańnamaǵa saı eń qatań sharalar qoldanyldy», - deıdi SQO PD JPQ basqarmasynyń bastyǵy Aıdyn Baımatov.

Jalpy, «Mas júrgizýshi» jedel aldyn alý is-sharasy aıasynda polıtsııa qyzmetkerleri 3 myńnan astam túrli jol qozǵalysy erejelerin buzý faktisin anyqtady.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT