SQO-da bıyl 3 myńnan asa adam «Bastaýmen» kásipkerlik negizderin úırenedi

PETROPAVL. QazAqparat – Soltústik Qazaqstan oblysynda «Bastaý» memlekettik baǵdarlamasyna bıyl 3 115 adam qatysady, grant berýge 700 mln teńge bólindi, dep habarlaıdy QazAqparat tilshisi.

Petropavlda SQO Kásipkerler palatasy janyndaǵy aýmaqtyq keńestiń keńeıtilgen otyrysy ótti. Aýdandyq fılıaldardyń jetekshileri «Bastaý» jáne «Jas kásipker» jobalarynyń júzege asýy boıynsha esep berdi.

«Kásipkerler palatasy «Bastaý» jáne «Jas kásipker» baǵdarlamalaryn júzege asyrý barysynda kýrstardan ótýshilerdi oqytýdyń tolyq kezeńimen qamtıdy. Ári qaraı olar jobalaryn qorǵaıdy, keıin bir jyl boıy jas kásipkerlerge palatanyń sarapshylary, bıznes trenerler qoldaý kórsetip, kómek beredi. ıAǵnı óz isin bastaýdy maqsat etken turǵyn memlekettiń qoldaýymen, mamandardyń kómegimen kásibin asha alady», - deıdi oblystyq aýmaqtyq keńestiń tóraǵasy Vladımır Bogdanov.

Óńirlik Kásipkerler palatasy baspasóz qyzmetiniń málimetinshe, búgingi kúni kýrstan ótken 302 túlek aýyl sharýashylyǵyn qarjylaı qoldaý qory arqyly qarjylandyryldy. Otyrysta memlekettik baǵdarlamaǵa qatysýshylar arasynda granttardy úlestirýde sybaılas jemqorlyqqa jol bermeý jaıy aıtyldy. Óıtkeni oblystyń keı aımaqtarynda mundaı derekter tirkelgen.

Kezdesýge kelgender «qarapaıym zattar ekonomıkasy» jobalyq keńsesiniń jumysymen de tanysty.

«Jobalyq keńse 109 jobany qarady. Onyń 70-in aýdandar jáne Petropavl qalalyq ákimdigi usyndy. Olardy saralaı kele jobalyq keńse bolashaǵy bar 55 jobany bólip aldy. Qazir ortaq somasy 12 mlrd 250 mln teńge bolatyn 41 joba monıtorıngileýden ótkizilip jatyr. 5 mlrd 266 mln teńgeniń 18 jobasy qarjylandyryldy. Taǵy úsheýine qarjy uıymdary 450 mln teńge berýge ázir. Olar taǵy 11 jobaǵa 4 mlrd 772 mln teńgeni berý-bermeý máselesin sheship jatyr», - oblystyq Kásipkerler palatasy jobalardy súıemeldeý bóliminiń jetekshisi Aslan Nurseıitov.

Mamandardyń málimetinshe, bıyldan bastap ulttyq kásipkerler palatasynda komplaens-baqylaý departamenti ashyldy. Aımaqtarda etıka boıynsha ýákilder jumys isteıdi. Osylaısha palatanyń ýákili Tımýr Eleýkın etıka Kodeksiniń erejelerimen tanystyrdy. Sonyń ishinde syıaqy, syılyq almaýdy, basqa da artyqshylyqtardy qoldanbaýdy eskertti. Óńirlik kásipkerler palatasynda barlyq qyzmet tegin kórsetiledi.