SQO-da bıyl 2,4 mlrd teńgege jańa medıtsınalyq qondyrǵy alynady

PETROPAVL. QazAqparat – Soltústik Qazaqstan oblysynyń emdeý mekemelerine bıyl 132 medıtsınalyq qondyrǵy alynady. Alǵashqylarynyń biri – zamanaýı MRT qazir oblystyq aýrýhanaǵa ornatylyp jatyr, dep habarlaıdy QazAqparat tilshisi.

Bul jaıynda SQO ákimi Qumar Aqsaqalov ákimdiktiń otyrysynda málimdedi.

Dúnıejúzilik banktiń qarajaty esebinen oblystyń 13 aýdanyna ýltradybystyq zertteý apparattary, 3 vıdeoendoskopııalyq tireý, 24 IVL apparaty alynbaq. Oblystyq perınataldyq ortalyqta dıagnostıkalyq ortalyq qurylyp, qajetti qondyrǵylarmen qamtylady. Jedel járdem kóliginiń bıyl 18-i alynýy tıis.

Qapzir oblystyq aýrýhanada MRT ornatylyp jatyr, jýyq arada iske qosylady.

«Qondyrǵy jıi isten shyǵatyn, sondyqtan adamdar basqa óńirlerge baryp, tekseriletin. Turǵyndar 7 kúnniń ishinde MRT ótýge múmkindik alýy kerek. Birneshe apta kútip otyrýy durys emes. Tekseristerdi 2 aýysymda júrgizý kerek», - dedi Qumar Aqsaqalov.

Taǵy bir MRT jyldyń sońyna deıin onkodıspanserde qoıylady. Sondaı-aq bir aptanyń ishinde kardıologııalyq ortalyqqa jańa angıograf ákelinedi.

SQO ákimi baspasóz qyzmetiniń habarlaýynsha, onkologııalyq ortalyqqa tsıfrly mammograf satyp alyndy. Qaziriń ózinde myńnan asa zertteý jasaldy. Alǵash ret aýdandyq aýrýhanalarǵa mammograftar satyp alynyp, 5 ÝZI apparaty ornatyldy.

Bıyl óńirdiń emdeý mekemelerine 2,4 mlrd teńgege túrli 132 qondyrǵy alynbaqshy. Densaýlyq saqtaý salasyn qarjylandyrý 48 mlrd teńgege deıin artty. Byltyr 42 mlrd teńge jumsalǵan bolatyn.