SQO-da bir jylda 100 qylmystyq isti ashqan tergeýshi úzdik atandy
2022 jylǵy 22 maýsym 22:06

SQO-da bir jylda 100 qylmystyq isti ashqan tergeýshi úzdik atandy

PETROPAVL. QazAqparat – Soltústik Qazaqstan oblysynda polıtsııa qyzmetkeri, 26 jastaǵy Berik Іlııasov úzdik tergeýshi atandy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, polıtsııa aǵa leıtenanty Berık Іlııasov byltyr aǵa tergeýshisi esebinde 100-ge jýyq qylmystyq isti ashqan. Jas mamannyń joǵary kásibıligi, adal eńbegi baǵalanyp, ol óńirdiń úzdik tergeýshisi atandy.

Berik Іlııasov QR ІІM B.Beısenov atyndaǵy Qaraǵandy akademııasynyń túlegi. Eńbek jolyn 2015 jyly Aqqaıyń aýdandyq polıtsııa bóliminde tergeýshiniń kómekshisi qyzmetinen bastaǵan.

«Joǵary zań biliminen basqa bul jumys úlken jaýapkershilikti, shydamdylyqty, suraqtardy saýatty ári naqty qoıa bilýdi, qylmystyq protseske qatysýshylardyń aıǵaqtarynan durys qorytyndy shyǵarýdy talap etedi», – deıdi tergeýshi.

Qylmystyq isterdi sot organdaryna deıin jetkizý - tergeýshiniń basty mindeti. Sondaı-aq maman oqıǵa ornyna shyǵyp, materıaldardy zerdeleıdi, sotqa deıingi tergeýlerdiń biryńǵaı tizilimine engizip, qylmystyq isti sotqa berý úshin dáleldemeler jınaıdy. Qazirgi ýaqytta Petropavl qalalyq polıtsııasynyń tergeý bóliminde jıi tergeletin qylmystardyń biri – ınternet-alaıaqtyq.

«Ókinishke qaraı, qanshama eskertip, aldyn alý jumystaryn júrgizgenimizben alaıaqtarǵa aldanatyndar azaımaı otyr. Internet-alaıaqtarmen kúresti bastaǵanymyzǵa bıyl úsh jyl. Jalpy turǵyndardy qylmyskerlerdiń osyndaı áreketterinen habardar etý – barlyq polıtsııa qyzmetkerleriniń ortaq mindeti», – deıdi Berik Іlııasov.

Jarty jyl ishinde jas maman sotqa ınternet-alaıaqtyq faktileri boıynsha 67 is jiberdi. Sonyń biri - áleýmettik jeli arqyly adamdarǵa taýarlyq nesıe rásimdegen qylmysker. Kúdikti 20 jastaǵy petropavl turǵyny bolyp shyqty. Ol eki aıda 15 adamdy aldap, olardyń esebinen smartfondar men basqa kerek-jaraqtardy alǵan.

Berik Іlııasov, sondaı-aq jekpe-jek jáne bokstan sport sheberligine kandıdat. Ol sporttyń bul túrlerimen 10 jasynan bastap aınalysyp keledi. Al týǵan-týystary ony qashan da qoldaýǵa ázir.


Uqsas jańalyqtar

Jańalyqtar

Úrdis

MURAǴAT