SQO-da bala-shaǵasymen kól basyna demalýǵa barǵan eki er adam sýǵa ketti

PETROPAVL. QazAqparat – Soltústik Qazaqstan oblysyndaǵy Kamennoe kólinde eki joldas jigit sýǵa ketti, dep habarlaıdy QazAqparat tilshisi.

SQO Tótenshe jaǵdaılar departamenti baspasóz qyzmetiniń málimetinshe, 4 tamyz kúni saǵat 8.20 shamasynda Qyzyljar aýdanyndaǵy Jelıakovo eldimekeninen 6 shaqyrymdaı jerde ornalasqan Kamennoe kólinde 43 jáne 40 jastaǵy eki adamnyń sýǵa batyp ketkendigi týraly habar tústi.

Oqıǵa ornyna jedel qutqarý qyzmeti shyqty. Qyzyljar aýdandyq tótenshe jaıdaılar bóliminiń qyzmetkerleri jetti.

3 tamyz kúni kól basyna qona jatyp demalýǵa eki otbasy Petropavldan kelgen. 4 tamyz kúni tańerteń 40 jastaǵy er adam 9 jasar qyzymen sýǵa shomylmaq bolady. Alaıda shamasyn durys baǵalamaǵan ol birazdan keıin bata bastaǵan.

«Er adam kómekke shaqyryp, aıqaılaǵan. Batyp bara jatyp ol qyzyn jaǵaǵa qaraı ıterip úlgergen. Sýǵa ketken joldasyn qutqarmaq bolyp kólge 1977 jyly týǵan er adam túsken. Alaıda ol da belgisiz jaǵdaıda sýǵa ketti», - deıdi SQO TJD bastyǵynyń orynbasary Nurlan Atyǵaev.

Qutqarýshylar eki er adamnyń denesin sýdan shyǵaryp, sot-medıtsınalyq saraptamaǵa jiberdi. Mamandardyń aıtýynsha, ázirge olardyń ishimdik ishken-ishpegeni belgisiz.

Kamennoe kóline sýǵa shomylýǵa tyıym salynǵan. Onda tek balyq aýlaýǵa ǵana ruqsat bar.

Jalpy SQO aýmaǵynda 4 tamyz kúni 22 oqys oqıǵa tirkeldi. Saldarynan 3 adam qaza tapty, sonyń ishinde eki adam sýǵa ketse, bireýi órt kezinde mert bolǵan.