SQO-da aýyl áıelderi arasynda kásipkerlikti damytýǵa arnalǵan semınar ótip jatyr

PETROPAVL. QazAqparat – Soltústik Qazaqstan oblysynda «Aýyldyq aımaqtarda áıelder kásipkerligin damytý» jobasy aıasynda eki kúndik semınar ótýde, dep habarlaıdy QazAqparat tilshisi.

«Atameken» kásipkerler palatasy SQOF baspasóz qyzmetiniń habarlaýynsha, aýdandardan kelgen kásipkerler qarjylyq saýatyn shyńdap, bıznesti damytýǵa baǵyttalǵan qarjylaı qoldaý tetikterimen tanysady. 

Semınardy «Atameken» Ulttyq kásipkerler palatasy men Azııa damý banki uıymdastyrǵan. 

Soltústik Qazaqstan oblysy – aýyl kásipkerlerin jınaǵan altynshy óńir. 40 áıel eki kún boıy bıznesti tabysty júrgizýge qajet bilim alady. Onyń ishinde bıznes-jospardy durys qurý, PR bıznes, marketıng, netvorkıng – qajetti tanystyqty damytýdy úırenedi jáne zań, qarjy aspektilerin zerdelep, zertteıdi. Semınarǵa Azııa damý bankiniń ókili Rafael Akýıno arnaıy keldi.

«Atamekenniń» qoldaýymen biz áıelder kásipkerligin damytýdy josparladyq. Olar óz kezeginde jergilikti ekonomıkany damytýǵa atsalysady. Halyqty jumyspen qamtıdy. Osy eki kún ishinde áıelder kásipkerligin damytýǵa basty kedergilerdi anyqtap, kómektesýge tyrysamyz», - deıdi Azııa damý banki ókildiginiń operatsııalyq máseleler boıynsha sarapshysy Rafael Akýıno.

Uıymdastyrýshylar semınarǵa mańǵystaýlyq kásipker Sholpan Túsipbekovany bıznes-trener retinde arnaıy shaqyrǵan. Ol óz tájirıbesin negizge ala otyryp, myqty ári tabysty kásiporyn qurýdyń qyr-syrymen bólisti.

«Bıznesti jetistikke jetkizý úshin ózińniń de jeke basyńdy únemi damytyp otyrý qajet. Muny bızneske kelgen qyz-kelinshekter túsinýi kerek. Al qalǵan qajetti qoldaýdy búginde kásipkerler palatasy tolyǵymen kórsetip jatyr. Kezdesýge biz túrli qarjy uıymdarynyń ókilderin de shaqyrdyq. Olar óz ónimderi jaıynda aıtady», - dedi Sholpan Túsipbekova.

Aqqaıyń aýdanynyń turǵyny Ásem Tursynbaeva - óz kásibin endi bastap jatqandardyń biri. Ol kerme tóbe montajdaıtyn fırma ashqan. Ásem - «Bastaý Bıznestiń» túlegi.

«Bastaý Bıznes» jobasy bizge jol ashty. Sol jerde alǵan bilimimdi qoldanyp, jeke kásipkerlikti iske qostym. Grantqa qondyrǵy satyp aldym. Maýsym aıynan beri jumys istep jatyrmyn. Qyzmetime suranys bar. Bul semınarda óz kásibimdi damytýǵa qajet bilim alǵym keledi», - deıdi Ásem Tursynbaeva.

Mamandardyń málimetinshe, SQO-da 290 myń áıel turady. Onyń 44 myńy - ózin-ózi jumyspen qamtyp otyrǵandar. Óńirdegi 37 myń shaǵyn jáne orta bıznes sýbektileriniń 45%-yn qyz-kelinshekter basqaryp otyr.