SQO ákimi jas ananyń jumbaq ólimi jan-jaqty tekseriletinin aıtty
2022 jylǵy 28 qańtar 00:21

SQO ákimi jas ananyń jumbaq ólimi jan-jaqty tekseriletinin aıtty

PETROPAVL. QazAqparat – Soltústik Qazaqstan oblysynda bes balanyń anasy - 34 jastaǵy kelinshek aýrýhanada qaıtys bolyp, onyń kóz jumǵany týraly qujattar tek bir aıdan keıin ǵana toltyrylyp, kúıeýine berilgen. Bul jaıynda BAQ-tan bilgen óńir basshysy derektiń jan-jaqty tekserilip, kinálilerdiń jaýap beretinin aıtty, dep habarlaıdy QazAqparat tilshisi.

Jýrnalıst Ýlıana Áshimovanyń málimetinshe, SQO Bolshoı Izıým eldi mekeniniń turǵyny Áıgerim Qazezova besinshi balasyna júkti bolyp, 35 aptada aýdandyq aýrýhanaǵa saqtaýǵa jatqyzylady.

Keıin dárigerler kelinshekti úıine jiberedi. Biraq kelesi kúni áıelde jótel paıda bolyp, kúıeýi ony qaıtadan aýrýhanaǵa aparady.

Sol kúni Áıgerimdi Petropavlǵa, oblystyq kópsalaly aýrýhanaǵa jóneltedi. PTR-testi arqyly kelinshektiń koronavırýs juqtyrǵany anyqtalyp, birden júktiliktiń 36 aılyǵynda ony dárigerler kesir tiligi arqyly bosandyrady.

5 tamyzda jas ana Aıǵanym atty qyzyn dúnıege ákeledi.

Kúıeýi Saǵdat kelinsheginiń jaǵdaıyn kúndelikti dárigerler arqyly bilip turǵan.

Aq halattylar áıeldiń aýrýy asqynyp, pnevmonııaǵa ushyraǵanyn, jansaqtaý bólimshesinde ókpeni jasandy jeldetý apparatynda jatqanyn aıtqan.

Al 22 tamyz kúni aýrýhanadan habarlasyp, áıeliniń qaıtys bolǵanyn jetkizgen.

23 tamyz kúni týǵan-týystary, aýyldastary Áıgerim Qazezovany jer qoınaýyna tapsyrdy.

Al kelesi kúni áıeliniń qujattaryna kelgen Saǵdatqa aýdandyq aýrýhanada ony túrli syltaý aıtyp bermegen.

Tek bir aıdan keıin ǵana habarlasyp, aýrýhana qyzmetkerimen baryp halyqqa qyzmet kórsetý ortalyǵynan qujattaryn alǵan.

Jýrnalıstiń aıtýynsha, bul oqıǵada túsiniksiz jaǵdaı kóp, sonyń biri – kelinshektiń qaıtys bolǵan kúnin tek bir aı ótkennen keıin ǵana tirkegen.

Bul jaıt oblys ákimi Qumar Aqsaqalovtyń nazarynan tys qalmady. Óńir basshysy óziniń áleýmettik jelidegi paraqshasynda bul jaıttyń tolyq tekseriletinin málimdedi.

«Patsıent Áıgerim Qazezovanyń ólimi týraly maqalany oqydym. Qazezovtar otbasyna qaıǵyryp kóńil aıtamyn. Bul óreskel jaǵdaı. Arnaıy komıssııa qurylyp, táýelsiz sarapshylar tartylady. Jan-jaqty tekserý júrgiziledi. Eger bul fakt rastalsa, kináliler zańǵa sáıkes qatań jazaǵa tartylyp, qyzmetinen bosatylady», - dep jazdy Qumar Aqsaqalov.


Jańalyqtar

MURAǴAT