+7 (701) 759 90 19
USD 411.66 EUR 465.92
RUB 5.81 CNY 58.79
Jańalyqtar

Shymkentten Shyǵysqa kóshken kópbalaly ana: Aptap ystyqtan qytymyr aıazǵa úırený ońaı bolǵan joq

2020 jylǵy 22 aqpan 14:51
Bólisińiz:
Shymkentten Shyǵysqa kóshken kópbalaly ana: Aptap ystyqtan qytymyr aıazǵa úırený ońaı bolǵan joq

ÓSKEMEN. QazAqparat – Shýaqty Shymkentten aıazy qatty Altaıǵa kóship kelgen otbasy búginde bul sheshimderine esh ókinbeıdi. Alaıda áýel basta kindik qany tamǵan jerden ketip jat ólkege boı úıretý ońaıǵa soqpaǵan. Biraq qazirde adal eńbekterimen 5 balasyn asyrap otyrǵan ata-ana «Shyǵysqa kelip shyraıymyz kirdi» deıdi. QazAqparat tilshisi Rıdder qalasynda tiginshilikpen aınalysatyn otanasy Ánel Qurbanovamen suhbattasyp qaıtqan bolatyn.

Uqsas jańalyqtar

- Shyǵys Qazaqstanǵa qaı jyly keldińizder?

- Biz Shymkent qalasynda turdyq. Zaıybym Berik ekeýimiz jumyssyz edik. Birde kúıeýime Pavlodar qalasyndaǵy dosy habarlasyp, qonys aýdarý baǵdarlamasy týraly aıtty. Qyzyǵýshylyǵym oıanyp, bul jaıly kóbirek maǵlumat jınaýǵa kiristim. Jumyspen qamtý ortalyǵyna baryp, baǵdarlamanyń búge-shúgesimen tanysyp ta qaıttyq. Aqylymyz altyǵa, oıymyz onǵa bólinip túbinde kóshý jaıly sheshim qabyldadyq.

2015 jyldyń qańtar aıynda Rıdder qalasyna kóship keldik. Qaqaǵan aıaz. «Altaıdyń qysy alty aıǵa sozylady» dep beker aıtpaǵan eken ǵoı. Ol kezde 4 balamyz bar. Úlkenim – 7, kenjem – 1 jasqa endi tolǵan edi. Bul jerge Ońtústikten 30 otbasy qonys aýdaryp keldik. Ár januıaǵa 445 950 teńgeden berildi. Úsh bólmeli páterdi jalǵa alyp, kún keshe bastadyq. Joldasym sport mektebine júrgizýshi, ózim balabaqshaǵa tárbıeshi bolyp ornalastym. Alaıda kishkentaıymyz Elaman jıi syrqattanyp qala berdi. Ekeýimiz de tańnyń atysynan kúnniń batysyna deıin úı betin kórmeımiz. Jat jerde balany tastap ketetin týysqandarymyz bolmaǵandyqtan bizge aýyr tıdi. Shynymdy aıtsam, sol kezderi týǵan jerdiń topyraǵynan alystaǵanyma ishteı qatty ókinip júrdim. Oıym san-saqqa júgirip, shymqalaǵa qaıta oralǵym keldi. Birde sabyr sýym sarqylyp kúıeýime ishtegi sherimdi aıtyp saldym. Aıtqanymdy muqııat tyńdap shyqqan ol kóz jasymdy súrtip «Osynda kelerde ońaıǵa soqpaıtynyn bildik qoı. Bul sheshimdi qabyldamas buryn myń oılanyp, júz tolǵandyq emes pe? «Ótkelde atyńdy aýystyrma» degendeı borkemiktik tanytpa» dep jiger bergendeı boldy. Sóıtip kúndi-kúnge jalǵap ómir súrip jattyq. Synaptaı syrǵyǵan ýaqyt zýyldaı berdi. Arada bir jyl ótkende taǵy da sábıli boldyq.

- Tiginshilikpen qalaı aınalysa bastadyńyz?

- Bir baıqaǵanym, munda tiginshilikpen shuǵyldanatyndar joqtyń qasy eken. Ulttyq naqyshtaǵy kıimderdi, quraq kórpelerdi múlde keziktirmeısiń. Dekrette otyrǵanymda tigin máshınesin satyp alyp, kórshi-qolańnan, tanystardan tapsyrys ala bastadym. Buıymdardyń tigilý sapasy joǵary bolǵandyqtan suranys ta arta tústi. Kórshilerdiń bárine derlik perde tigip berdim. Oılana kele, osy kásippen túbegeıli aınalysýǵa sheshim qabyldadym. Bıznes jospar quryp, qalalyq Kásipkerler palatasyna apardym. Ony oıdaǵydaı qorǵap shyǵyp, 250 myń teńge grant utyp aldym. Al 2019 jyly «Bıznestiń jol kartasy – 2020» baǵdarlamasy aıasynda maǵan qaıtarymsyz 2 mln teńge berildi. Bul qarajat arqyly qajetti jabdyqtarǵa qol jetkizdim. Búginde avtokólik oryndyqtaryna arnalǵan qaptamalar, oıýly kórpeshe, shıquraq, perde, besik jabdyqtary men kórpe-jastyqty oıýlap tigemin. Allaǵa shúkir, kásibim alǵa basyp keledi.


- Shymkenttiń shilińgir ystyǵynan Shyǵystyń shyńyltyr aıazyna úırený ońaıǵa soqpaǵan shyǵar, sirá?

- Onyńyz ras. Jańaǵy aıtqandaı, basynda balalarym jıi aýyryp qalatyn-tuǵyn. Nesi bar, ýaqyt óte kele Shyǵystyń shyrqyńdy ketiretin qatal aýa-raıyna kóndige bastadyq. Qazir kerisinshe ul-qyzdarym jazǵy kanıkýlda Shymkentke qydyryp barsa, syrqattanyp qalady. Birneshe kúnnen keıin «Úıge qaıtaıyqshy» dep qulaq etimdi jep, mazalary qashady. Ózimizdiń de ańsarymyz Altaıǵa aýyp turatynyn nesine jasyraıyn. Sózdiń shyny kerek, bul jaqtyń klımatyna, turǵyndaryna ábden baýyr basyp qalyppyz. Tabıǵaty tipten tamasha! Aspanmen astasqan asqar taýlary, ıt tumsyǵy ótpeıtin ný ormandary, balyǵy jylqy jýsatpas, baqasy kisi uıyqtatpas darııa kólderi qaraǵanda kóz qumaryn qandyrady.

- Desek te, jańa ólkede janyńyzǵa jaqpaǵan jaıttar da bar shyǵar?

- Saýalyńyz oryndy. Ras, qanym qazaq bolǵan soń kókeıge kelgen ókpe-nazymdy da aıta keteıin. Munda ulttyq salt-dástúrimizdiń shyraǵy sónip bara jatqan sııaqty. Olaı deıtinim, rıdderlikter qyzdaryn saltqa sáıkes uzatpaıdy, sábılerin besikke salmaıdy eken. Bul durys emes. Ózim baýyr eti balalarymnyń árqaısysyn besikke bólep ósirdim. Qazir qol-aıaqtary oqtaýdaı túzý. Bile bilsek, qazaqtyń ár salt-dástúriniń, yrym-tyıymynyń mán-maǵynasy tereńde jatyr ǵoı.

- Eki óńir halqynan qandaı aıyrmashylyqtardy baıqadyńyz?

- Shyǵys Qazaqstanda bári zań júzinde, qujat arqyly iske asady. Aýrýhanaǵa barsań túgeli yń-shyńsyz kezek saqtaıdy. Al Shymkentte tanys dárigeri barlar kezekke turmaı-aq kire beredi. Kishkentaıymdy bosanǵanda týǵanda mundaǵy aq halattylar asty-ústime túsip, jaǵdaıymdy udaıy baqylap otyrdy. Qınalǵan sátte janyńnan tabylǵan meıirbıkelerge qalaı rıza bolmassyń.

- Al qazir she, qonys aýdarǵanyńyzǵa ókinbeısizder me?

- Esh ókinbeımiz. Kerisinshe, qýanamyz. «Táýekel taý jyǵar» dep beker aıtylmaǵan eken. Qudaıǵa shúkir, búginde turmysymyz ońalyp, el qatarly ómir súrýdemiz. Shańyraǵymyzǵa shattyq ákelgen bul mekende 5-shi sábıimiz dúnıege keldi. Memlekettik qoldaýdyń arqasynda ózim jeke kásibimniń keregesin keńeıttim. Alǵa qoıǵan maqsat-murattarymyz áli de kóp. Sol josparlarymyzdyń barlyǵy Shyǵys Qazaqstanmen baılanysty.

Suhbatyńyz úshin rahmet!
Bizdiń kanalymyzǵa jazylyńyz:

Bólisińiz:

Avtor:

Talǵatjan Muhametbekuly

Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Aıdar Ospanalıev
Aıdar Ospanalıev
954-059

MURAǴAT