Shymkenttegi jarylystan kúzetshimen qosa bir náreste shetinedi

ShYMKENT. QazAqparat - Osydan nebary 18 kún buryn ǵana dúnıege kelgen sábı úshemniń biri edi. Túrkistan oblystyq qoǵamdyq densaýlyq basqarmasynyń málimetinshe, jarylys kezinde №1 perınataldyq ortalyqta eki júzden asa adam bolǵan, dep habarlaıdy QazAqparat tilshisi.

«Shymkent qalasyndaǵy №1 oblystyq perınataldyq ortalyqta jarylys kezinde 189 patsıent pen 65 qyzmetker bolǵan. Jarylys saldarynan ortalyqtyń kúzetshisi jáne 1 náreste kóz jumdy. Shetinegen sábı 18 kún buryn týǵan. Taǵy 8 adam zardap shegip, qalanyń medıtsınalyq mekemelerine jatqyzyldy. Atap aıtqanda, oblystyq klınıkalyq aýrýhanaǵa, qalalyq №1 jáne №2 aýrýhanaǵa jatqyzyldy», - delingen basqarma habarlamasynda.

Túrkistan oblysy ákiminiń baspasóz qyzmetinen málim bolǵanyndaı, Ómirzaq Shókeev tıisti organdarǵa qaıtys bolǵan kúzetshiniń otbasyna materıaldyq kómek berý, ıaǵnı jerleý rásiminiń shyǵynyn tolyq kóterýdi tapsyrdy.

Aıta keteıik, buǵan deıin Shymkenttegi perınataldyq ortalyqtyń qasyndaǵy dári saqtaıtyn eki qabatty ǵımaratta jarylys bolǵanyn habarladyq. Perzenthana ǵımaraty men turǵyn úıge zaqym kelip, ondaǵy adamdar qaýipsiz jerge kóshirildi.