Shymkentte tórt jasar balanyń ókpesinen 8 sm ehınokokk qurty alyndy
2022 jylǵy 20 mamyr 16:53

Shymkentte tórt jasar balanyń ókpesinen 8 sm ehınokokk qurty alyndy

ShYMKENT. QazAqparat - Shymkent qalalyq klınıkalyq balalar aýrýhanasynyń dárigerleri ehınokokk dıagnozy qoıylǵan 4 jasar balaǵa ashyq túrde operatsııa jasady, dep habarlaıdy QazAqparat tilshisi.

Naýqas balany qalalyq klınıkalyq balalar aýrýhanasyna 11 mamyr kúni jedel járdem jetkizgen.

Dárigerler patsıentti rentgen, kompıýterlik tomografııa tekserýinen ótkizip, ókpesiniń oń jaq bóliginen ehınokokk kıstasyn anyqtaǵan.

«Ehınakokk kıstasy anyqtalǵan soń balany otaǵa daıyndadyq. Operatsııany 13 mamyr kúni jasadyq. Balanyń ókpesine ashyq túrde ota jasalyp, qurtty kıstamen birge alyp shyqtyq. Qurt balanyń keýde qýys aımaǵyn jaılaǵan. Bir saǵatqa sozylǵan operatsııa sátti ótti»,-deıdi qalalyq klınıkalyq balalar aýrýhanasy hırýrgııa bólimshesiniń meńgerýshisi Ákim Túlkibaev.

Naýqas bir kún jansaqtaý bóliminde jatyp, bólimshege aýysqan. Densaýlyq jaǵdaıy jaqsarǵan patsıentti dárigerler 18 mamyr kúni aýrýhanadan shyǵardy.

Dárigerlerdiń aıtýynsha, ehınokokkoz aýrýynyń qozdyrǵyshtary ıt, mysyq jáne tórt túlikten juǵýy múmkin.

Sonymen qatar, durys pisirilmegen aýrý maldyń eti de adamǵa úlken qaýip tóndiredi.

Sol sebepti mamandar balalardyń tamaqtanýyna úlken mán berý kerek ekenin aıtady.


Uqsas jańalyqtar

Jańalyqtar

MURAǴAT