Shymkentte tennısten chellendjer týrnıri bastaldy
2022 jylǵy 15 mamyr 11:47

Shymkentte tennısten chellendjer týrnıri bastaldy

NUR-SULTAN. QazAqparat – Shymkent qalasynda Beeline Challenger 80 serııasy boıynsha ekinshi týrnır bastaldy, dep habarlaıdy QazAqparat tilshisi.

Qazaqstan tennıs federatsııasy málim etkenindeı, qazirgi kezde irikteý saıystary ótýde.

Qazaqstandyqtardan alǵashqy bolyp kortqa shyqqan Nıkıta Sıdorov úndistandyq Ardjýn Kadhege jol berdi – 4:6, 1:6. Endi A.Kadhe irikteý saıystarynyń fınalynda taǵy bir qazaqstandyq Grıgorıı Lomakınmen sheberlik baıqasady. Qaı jeńgeni negizgi jarysqa joldama alady.

Búgin sondaı-aq irikteý saıystarynyń jartylaı fınalynda Tımýr Máýlenov ıtalııalyq Matteo Donattımmen, Roman Konovalov amerıkalyq Evan Jýmen ózara myqtyny anyqtaıdy.

Negizgi týrnırde qazaqstandyqtardan birinshi raketka bolyp tirkelgen Denıs Evseev alǵashqy matchyn amerıkalyq Ýlıs Blanshpen ótkizedi.

Jarysqa arnaıy shaqyrtý alǵan Dostanbek Tashbolatov rýmynııalyq Fılıpp Krıstıan Jııanýmen, Beıbit Jýkaev irikteý saıysy jeńimpazdarynyń birimen kezdesedi.

Keshe Beeline Challenger 80 boıynsha Shymkentte osyndaı doda aıaqtalǵan bolatyn. Jekeleı synda fınalda germanııalyq Sebastıan Fansheloýdy 6:4, 7:6 (7:3) esebimen utqan amerıkalyq Emılıo Nava chempıon atandy.

Eske sala keteıik, budan buryn qazaqstandyq jas tennısshilerdiń halyqaralyq týrnırlerde chempıon atanǵanyn, Andreı Golýbevtiń Rım masters týrnıriniń fınalyna shyǵa almaı qalǵanyn jazǵan bolatynbyz.





Uqsas jańalyqtar

Jańalyqtar

Úrdis

MURAǴAT