Shymkent turǵyndarynyń 48 paıyzy ortalyq káriz júıesin paıdalana almaı otyr
2022 jylǵy 24 maýsym 22:15

Shymkent turǵyndarynyń 48 paıyzy ortalyq káriz júıesin paıdalana almaı otyr

ShYMKENT. QazAqparat - Shymkent turǵyndarynyń 48 paıyzy ortalyq káriz júıesin paıdalana almaı otyrú Bul týraly QR Indýstrııa jáne ınfraqurylymdyq damý vıtse-mınıstri Erkebulan Daýylbaevtyń Shymkenttegi qurylys jumystarymen tanysý maqsatynda barǵan saparynda málim boldy.

Sapar barysynda vıtse-mınıstr Shymkent qalasy ákiminiń orynbasarlary men jergilikti basqarma basshylarymen keńes ótkizdi, dep habarlaıdy QazAqparat mınıstrliktiń baspasóz qyzmetine silteme jasap.

Vıtse-mınıstr qalada turǵyn úı qurylysynyń qarqyny men turǵyn úı-kommýnaldyq sharýashylyǵy boıynsha atqarylyp jatqan jumystardy oń baǵalady. Dese de salada birqatar kemshilikter bar.

Olardyń qatarynda jumys isteıtin jastarǵa arnalǵan «Turan» shaǵynaýdanynda salynyp jatqan 6 turǵyn úıdiń merziminde tapsyrylmaýy men 7 memlekettik mańyzdy nysan qurylysynyń toqtaýy (káriz júıeleri jáne t.b.) sııaqty máseleler bar.

«Qalalyq ákimdik bıýdjetti tıimdi ári sapaly josparlap, jobalardy júzege asyrýdy qamtamasyz etýi tıis. Sonymen qatar memlekettik ınvestıtsııa esebinen qurylysy júrgizilip jatqan nysandarǵa turaqty monıtorıng júrgizip, tıisti sharalar qabyldaýy qajet. «eQurylys» jáne «E-Shańyraq» aqparattyq júıesi portalyn tolyqtyrý men qarjylandyrý máselesin sheshý maqsatynda jobalyq-smetalyq qujattamany daıarlaýdy qamtamasyz etý kerek», – dedi Erkebulan Daýylbaev.

Shymkent qalasy turǵyndaryn mazalap júrgen máseleniń biri – ortaq káriz júıesine qosylý deńgeıiniń tómendigi. Búginde bul taraptaǵy kórsetkish 52 paıyzdy quraıdy. Bylaısha aıtqanda, 48 paıyz qala turǵyny ortalyq káriz júıesin paıdalana almaıdy.

Vıtse-mınıstr qorshaǵan ortanyń lastaný deńgeıin azaıtý úshin qalalyq ákimdikke turǵyndardy ortalyq káriz júıesine qosý jumysyn jedeldetýdi tapsyrdy.


Uqsas jańalyqtar

Jańalyqtar

Úrdis

MURAǴAT