Shyǵys Qazaqstanda úılerdi sý bassa, halyqty evakýatsııalaıtyn 68 oryn daıyndaldy
ÓSKEMEN. QazAqparat – Shyǵys Qazaqstan oblysynda úılerdi sý bassa, halyqty evakýatsııalaıtyn 68 oryn daıyndaldy, dep habarlaıdy QazAqparat tilshisi.
Búgin oblys ákiminiń birinshi orynbasary Almashan Smatlaevtyń tóraǵalyǵymen tótenshe jaǵdaılardyń aldyn alý jáne joıý jónindegi ShQO komıssııasynyń kezekti otyrysy ótti. Onda kóktem kezindegi basty másele - sý tasqynyna daıyndyq jaıy sóz etildi.
«Qys bastalǵaly jergilikti atqarýshy organdar 191 000 tekshe metrden astam qar shyǵardy. Sý tasqyny qaýpi joǵary kezeńde jedel den qoıý úshin jeke quramnan 1719 adam, 224 motopompa, qutqarýshylar men jergilikti atqarýshy organdardyń 83 júzý quraly, 750-den astam tehnıka saqadaı saı. Qajet bolǵan jaǵdaıda QR TJM 68303 áskerı bóliminiń azamattyq qorǵanys polki qosymsha tartylýy múmkin», - deıdi A.Smatlaev.
Úılerdi sý basqan jaǵdaıda evakýatsııalanatyn halyqty ornalastyrý úshin qalalar men aýdandardyń ákimderi jalpy syıymdylyǵy 6500 adamnan asatyn 68 oryn daıyndady.
ShQO TJD bastyǵynyń orynbasary Arman Toqanov óz baıandamasynda óńir boıynsha sý tasqynyna beıim 71 eldi meken bar ekenin atap ótti.
«Atqarylǵan jumystardyń arqasynda 15 eldi mekende qaýip tolyqtaı joıylyp, 46-synda azaıtylǵan. Sý tasqynyna qarsy is-sharalardyń Jol kartasy sheńberinde 2022 jyly shara iske asyryldy. Bıyl taǵy 5 shara qolǵa alynbaq», - deıdi ol.
