Shyǵys Qazaqstanda taýda eki jarylys jasalyp, 5200 tekshe metr qar túsirildi
ÓSKEMEN. QazAqparat – Shyǵys Qazaqstan oblysynda taýda eki jarylys jasalyp, 5200 tekshe metr qar túsirildi, dep habarlaıdy QazAqparat tilshisi.
ShQO Tótenshe jaǵdaılar baspasóz qyzmetiniń málimetine súıensek, óńir aýmaǵynda jasandy jolmen qar túsirildi.
«Qar kóshkininiń aldyn alý sharasy «Óskemen-Altaı» tasjolynyń 58-66 shaqyrymynda júrgizildi. «Qazseldenqorǵaý» ShQ fılıalynyń mamandary men TJD qyzmetkerleri taýda 2 jarylys jasady. Sonyń nátıjesinde, 5200 tekshe metr qar tústi. Birden jol qardan tazartyldy», - delingen aqparatta.
Jalpy kóshkin qaýpi bar kezeń bastalǵaly beri Shyǵys Qazaqstanda barlyǵy 58 ret jasandy jolmen qar kóshkini júrgizilip, 249 260 tekshe metr qar túsirilgen.
Osy rette, qutqarýshylar óńir jurtshylyǵyna kóshkin qaýpi joǵary kezeńde taýly jerlerge barmaýǵa keńes berdi.
Foto: TJD
