Shyǵys Qazaqstanda bir kúnde 9 myń adam revaktsınatsııadan ótti
2022 jylǵy 28 qańtar 00:58

Shyǵys Qazaqstanda bir kúnde 9 myń adam revaktsınatsııadan ótti

ÓSKEMEN. QazAqparat – Shyǵys Qazaqstan oblysynda bir kún ishinde 9 myń adam revaktsınatsııadan ótti , dep habarlaıdy QazAqparat tilshisi.

ShQO ákimdiginiń málimetine súıensek, óńirde koronavırýsqa qarsy revaktsınatsııalaý naýqany belsendi júrgizilýde.

Sońǵy táýlik ishinde 9 myńnan astam adam vaktsınanyń úshinshi komponentin saldyrǵan.

Birinshi aqpanǵa qaraı oblys boıynsha 238 myń adam revaktsınatsııadan ótedi dep kútilýde. Búginde statsonarlardaǵy tósek-oryn qorynyń júktemesi - 17 paıyz.

Medıtsınalyq mekemelerde koronavırýs juqtyrǵan 251 naýqas emdelýde. Reanımatsııalardaǵy patsıentter sany 9 paıyzdy qurap otyr.

«COVID-19 ınfektsııasyna shaldyqqandar sany kún saıyn azaıyp keledi. Demek, aımaqta shekteý sharalary birtindep jeńildetiledi. Buǵan deıin de shaǵyn bıznes ókilderine qatysty keıbir shekteýler alynyp tastalǵan bolatyn. Aldaǵy ýaqytta da bul baǵyttaǵy jumystar jalǵasady», - dedi Shyǵys Qazaqstan oblysynyń ákimi Danıal Ahmetov.


Jańalyqtar

MURAǴAT