Shyǵarmashylyq úıirme men sport sektsııalaryna qosymsha 97 mlrd teńge  qajet - Dáýren Abaev
2022 jylǵy 22 maýsym 14:29

Shyǵarmashylyq úıirme men sport sektsııalaryna qosymsha 97 mlrd teńge qajet - Dáýren Abaev

NUR-SULTAN. QazAqparat – Shyǵarmashylyq úıirmeler men sport sektsııalaryn qarjylandyrýǵa qosymsha 97 mlrd teńge qajet. Bul týraly QR Mádenıet jáne sport mınıstri Dáýren Abaev aıtty, dep habarlaıdy QazAqparat tilshisi.

«Búgin osy jerge el azamattaryn tolǵandyryp júrgen asa mańyzdy suraqty talqylaý úshin jınalyp otyrmyz. Áńgime shyǵarmashylyq úıirmeler men sport sektsııalaryn jan basyna shaqqandaǵy qarjylandyrý júıesiniń ári qaraıǵy jumysy týraly bolady. Qazirgi ýaqytta 495 myń bala 15 myń úıirme men sektsııaǵa barady. Oǵan 32 mıllıard teńgeden asa qarajat bólindi. Jyl sońyna deıin qosymsha 97 mlrd qajet. Aıtylatyn syn men qoıylatyn suraqtardyń aldynda bir ǵana dúnıeni aıtqym keledi: artsport – buqaralyq sportty damytýdyń jalǵyz mehanızmi emes», - dedi Dáýren Abaev Ortalyq kommýnıkatsııalar qyzmetindegi baspasóz máslıhatynda.

Onyń dereginshe, búginge deıin 41 dene shynyqtyrý-saýyqtyrý keshenin iske qosý arqyly jaqsy nátıjege qol jetkizildi. Onyń 32-si aýdan ortalyqtary men aýyldyq jerlerde ashyldy.

«Sonymen qatar aýyldyq jerlerde sporttyq is-sharalar men sektsııalardy uıymdastyrýǵa jaýapty 3 064 jattyqtyrýshy jumysqa alyndy. Jastardy sportqa tartý úshin ótken jyly basketbol, voleıbol, fýtzal, qazaqsha kúres, ústel tennısi sııaqty sport túrlerinen mektepishilik jáne stýdentter arasynda ulttyq lıgalar ótkizildi. Bilim berý júıesiniń barlyq deńgeıinde dene shynyqtyrý pániniń ustazdaryna sabaqtan tys is-sharalardy ótkizgeni úshin qosymsha aqy taǵaıyndaldy. ıAǵnı, bul rette 30 myńnan astam dene tárbıesiniń muǵalimi qamtyldy. 2022-2024 jyldary atalǵan maqsatta aımaqtarǵa qosymsha 21 mlrd teńge bólinedi», - dedi ol.

Mınıstrdiń dereginshe, búginge deıin balalardy qosymsha sport sektsııalarymen, úıirmelermen qamtý 73 paıyzdy qurap otyr.

«Jan basyna shaqqandaǵy qarjylandyrý júıesi men bilim berý uıymdaryndaǵy sektsııalardan bólek, balalar men jasóspirimderdi oqytatyn sport mektepterinde taǵy 386 myń bala bilim alýda. 2022 jyly qarjylandyrýdyń jalpy kólemi 123,7 mlrd teńgeni quraıdy», - dedi Dáýren Abaev.


Seriktester jańalyqtary

Jańalyqtar

Úrdis

MURAǴAT