Shýda tártip saqshylaryn jabyla urǵandardyń arasynda qyzdar da bar
2022 jylǵy 11 mamyr 17:41

Shýda tártip saqshylaryn jabyla urǵandardyń arasynda qyzdar da bar

TARAZ. QazAqparat – Shý aýdanynda polıtsııa qyzmetkerlerine qarsy kúsh qoldanǵan 13 adam polıtsııaǵa jetkizildi. Olardyń arasynda 2 qyz da bar, dep habarlaıdy QazAqparat tilshisi.

Aǵymdaǵy jyldyń 7 mamyryna qaraǵan túni Jambyl oblysy Shý aýdanynyń polıtsııa bólimine bir top adamnyń polıtsııa qyzmetkerlerine qatysty kúsh qoldanǵany týraly habarlama kelip túsken.

Shý qalasynyń kólik beketi mańyndaǵy alańqaı janynda patrýldik polıtsııa qyzmetkerleri «VAZ-21014» markaly avtokóligin aldyńǵy jaǵynda memlekettik nómiri bolmaǵandyqtan toqtatqany anyqtaldy.

Mán-jaıdy anyqtaý barysynda avtomashınanyń júrgizýshisi men jolaýshylary zańdy talaptarǵa baǵynbaı, basqa da tanys adamdarymen birlesip, bılik ókilderine qarsylyq kórsetken.

«QR QK 380-babynyń 3-bóligi (bılik ókilderine kúsh qoldaný) boıynsha sotqa deıingi tergeý amaldary bastaldy.

Shý aýdanynyń polıtsııa bólimine 13 adam, onyń ishinde 2 qyz jetkizildi.

Qaqtyǵystyń 8 belsendi qatysýshysy ustaldy, 6 adamǵa «kúzetpen ustaý» túrindegi bultartpaý sharasy tańdaldy, al qyzdarǵa qatysty úı qamaǵyna alýǵa sanktsııa berildi»,-delingen polıtsııa departamenti baspasóz qyzmetiniń habarlamasynda.

Vedomstvo habarlamasynda qylmystyń taǵy bir belsendi qatysýshysyna qatysty «qamaýda ustaý» túrindegi bultartpaý sharasymen izdeý jarııalanǵandyǵy aıtylǵan.

Qazirgi ýaqytta polıtseılerdiń densaýlyǵyna zııan keltirý dárejesin anyqtaý maqsatynda sot-medıtsınalyq saraptamasy taǵaıyndalǵan.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT