Shortandy kentinde gaz ballony jarylyp, 3 adam mert boldy, taǵy on adam aýrýhanaǵa tústi
2021 jylǵy 17 qarasha 09:21

Shortandy kentinde gaz ballony jarylyp, 3 adam mert boldy, taǵy on adam aýrýhanaǵa tústi

KÓKShETAÝ. QazAqparat - Aqmola oblysynyń Shortandy kentinde gaz ballony jarylyp, 3 adam kóz jumdy, taǵy on adam aýrýhanaǵa tústi, dep habarlaıdy QazAqparat tilshisi.

Oqys oqıǵa túngi saǵat 22:00 shamasynda Shortandy kentinde Lıneınaıa kóshesi 28 meken-jaıy boıynsha ornalasqan úsh páterli turǵyn úıde boldy. Gaz ballonynyń jarylýy saldarynan 3 páterli jeke úı órtenip, onyń bir bóligi qulady.

Qazirgi málimet boıynsha, úıindiniń astynan úsh adamnyń denesi tabyldy, onyń bireýi kámelettik jasqa tolmaǵan bala. Sonymen birge, túrli deńgeıdegi dene kúıigimen 10 adam aýrýhanaǵa jatqyzyldy, onyń ishinde balalar bar. Keıbir zardap shekkenderdiń jaǵdaıy aýyr.

TJM resmı ókili Talǵat Ýálıdiń málimdeýinshe, Shortandy kentiniń №18 baılanys pýnktine polıtsııa bóliminiń kezekshisinen gaz ballonnyń jarylǵandyǵy týraly habarlama keshe saǵat 21:38-de kelip túsken.

Órtti sóndirýge TJD-nyń 35 qyzmetkeri men 7 tehnıkasy, «Jer Ana» JShS MEÓQQ-nyń 4 qyzmetkeri men 1 tehnıkasy jumyldyrylǵan.

«Baraq úlgisindegi páterde órt shyǵyp, shatyryn tolyqtaı jalyn sharpyǵan. Órttiń aýmaǵy shamamen 350 sharshy metrdi sharpyǵan. Órt saǵat 22:35-te aýyzdyqtalyp, saǵat 23:55-te tolyq sóndirildi. Oqıǵanyń mán-jaıy men sebepterin anyqtaý úshin Aqmola oblystyq tergeý-jedel toby jáne zertteý-órt zerthanasy jumys isteýde», delingen habarlamada.

Kýágerlerdiń aıtýynsha, oqıǵa ornyna jergilikti 80-ge jýyq turǵyn kómekke kelgen.

Sonymen qatar, Shortandy aýdandyq aýrýhanasyna Nur-Sultan qalasyndaǵy kópbeıindi oblystyq aýrýhanadan reanımatologtar men hırýrgtar keldi, sondaı-aq Kókshetaý qalasynan balalar reanımatologtary men hırýrgtary quramy bar sanavıatsııanyń kelýi kútilýde. Oqıǵa ornyna shuǵyl túrde Aqmola oblysy Densaýlyq saqtaý basqarmasynyń basshysy Narıman Syzdyqov shyqty.

«Qazirgi ýaqytta zardap shekken 11 adam, onyń ishinde bes eresek adam jáne alty bala bar. Zardap shekken on adam aýrýhanaǵa jatqyzyldy. Jaǵdaı óte kúrdeli. Qazirdiń ózinde sanıtarlyq avıatsııa boıynsha hırýrgter, sonyń ishinde balalar hırýrgtary jiberildi. Qaza bolǵandardyń sany artýy múmkin», - dep túsindirdi aımaqtyń bas dárigeri.



Jańalyqtar

MURAǴAT