ShQO: jer úılerde órt qaýipsizdigi talaptaryn buzǵan 43 myńǵa jýyq fakti tirkeldi
ÓSKEMEN. QazAqparat – Shyǵys Qazaqstan oblysyndaǵy jer úılerde órt qaýipsizdigi talaptaryn buzýdyń 43 myńǵa jýyq faktisi tirkeldi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, oblys boıynsha qańtar aıynda 50 órt boldy. Sonyń saldarynan 3 adam kóz jumǵan.
Pesh paıdalaný kezinde qaýipsizdik erejelerin buzýdan – 16, elektr jabdyqtaryn paıdalanǵan kezde qaýipsizdikti saqtamaýdan – 15, otty abaısyz qoldanýdan – 9 ret órt shyqqan.
«Jaǵdaıdy turaqtandyrý úshin qutqarýshylar turǵyndarǵa turaqty túrde túsindirý jumystaryn júrgizýde. Osy jyldyń basynan 16 549 reıd júrgizildi. Nátıjesinde 27 096 adamǵa qaýipsizdik boıynsha nusqaýlyqtar berildi. Al jylytý maýsymy bastalǵaly beri 163 996 reıd júrgizilip, 218 628 turǵyn qamtyldy. Jer úılerde órt qaýipsizdigi talaptaryn buzýdyń 42 820 faktisi tirkeldi», - dep habarlady vedomstvo ókilderi.
Turmysy tómen otbasylardyń úılerine de baqylaý júrgizilýde. Qańtar aıynda 24 ret reıd uıymdastyrylǵan.
