ShQO turǵynynyń úıinen qarý-jaraq arsenaly tabyldy
2021 jylǵy 29 qarasha 12:55

ShQO turǵynynyń úıinen qarý-jaraq arsenaly tabyldy

ÓSKEMEN. QazAqparat – Shyǵys Qazaqstan oblysynda polıtseıler jeke turǵyn úıdi tintý barysynda qarý-jaraq arsenalyn tapty, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, tártip saqshylary Ulan aýdany turǵynynyń úıinde sanktsııalanǵan tintý júrgizgen. Sonyń barysynda zańsyz saqtalǵan atys qarýynyń birneshe túri men oq-dáriler tabylǵan.

«Barlyǵy 4 myltyq tárkilendi. Naqty aıtqanda, kalıbri 5,6 mm «TOZ» markaly bir oıyq myltyq jáne 16 kalıbrli tegis uńǵyly úsh myltyq. Atalǵan fakti boıynsha 54 jastaǵy kúdiktige qatysty QR QK-niń 287-baby 3-bóligine sáıkes sotqa deıingi tergeý amaldary júrgizilýde», - dedi oblystyq PD bastyǵynyń orynbasary Talǵat Shaıahmetov.

Er adam 5 jylǵa deıingi merzimge bas bostandyǵynan aıyrylýy múmkin. Qazirgi ýaqytta tártip saqshylary kúdiktiniń bul qarýlardy qandaı maqsatta saqtaǵanyn anyqtap jatyr.


Jańalyqtar

Úrdis

MURAǴAT