ShQO-ǵa kelgen sheteldik jaıly ýaqytyly habarlamaǵan 200-den astam adam jaýapqa tartyldy
2022 jylǵy 6 shilde 15:21

ShQO-ǵa kelgen sheteldik jaıly ýaqytyly habarlamaǵan 200-den astam adam jaýapqa tartyldy

ÓSKEMEN. QazAqparat – Shyǵys Qazaqstan oblysyna kelgen shetel azamaty týraly quzyrly organdarǵa ýaqytyly habarlamaǵan 200-den astam adam jaýapqa tartyldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda «Nelegal-2022» jedel aldyn alý sharasyn júrgizýde. Shara barysynda kóshi-qon qyzmetiniń mamandary oblysta ýaqytsha jáne turaqty turatyn shetel azamattarynyń mekenjaılaryn jáne sheteldikterdi qabyldaýshy tulǵalardyń tıisti habarlamalaryn tekserip jatyr.

«Búginde aımaqqa kelgen sheteldik jaıly ýaqytyly habarlamaǵan 200-den astam Qazaqstan Respýblıkasynyń azamaty jaýapqa tartyldy. Máselen, Shemonaıha qalasyndaǵy qonaq úı ıesi onda 15 kúnnen artyq turǵan shetel azamatynyń bolǵany týraly quzyrly organdarǵa habar bermegen. Polıtseıler jeke kásipkerge qatysty ÁQBtK-tiń 518-baby 1-bóligine sáıkes ákimshilik hattama toltyrdy. Endi qonaq úı ıesi 10 AEK mólsherinde aıyppul tóleıdi», - delingen aqparatta.

Osy rette, kóshi-qon qyzmetiniń ókilderi sheteldikterdi qabyldaýshy jeke jáne zańdy tulǵalar 3 kún ishinde habarlaýǵa mindetti ekenin eskertedi. Ol úshin sol qala, aýdandaǵy kóshi-qon qyzmeti bólimshesine júginý qajet.

Esterińizge sala keteıik, osyǵan deıin Óskemende jeńgetaılyqpen aınalysqan saýna ákimshisi ustalǵanyn habarlaǵan bolatynbyz.


Uqsas jańalyqtar

Jańalyqtar

Úrdis

MURAǴAT