ShQO-da jaz shyqqaly ruqsat etilmegen jaǵajaıda shomylǵan 70 adam jaýapqa tartyldy
2022 jylǵy 1 shilde 02:05

ShQO-da jaz shyqqaly ruqsat etilmegen jaǵajaıda shomylǵan 70 adam jaýapqa tartyldy

ÓSKEMEN. QazAqparat – Shyǵys Qazaqstan oblysynda jaz shyqqaly beri ruqsat etilmegen jaǵajaıda shomylǵan 70 adam jaýapqa tartyldy, dep habarlaıdy QazAqparat tilshisi.

ShQO aqparat ortalyǵynda ótken baspasóz brıfıngi barysynda órt qaýpi joǵary kezeń men shomylý maýsymy týraly aıtyldy.

Óńir boıynsha bıyl 136 orman órti bolǵan.

Qyzyl jalynnyń aldyn alý maqsatynda qutqarýshylar, ormanshylar men jergilikti atqarýshy organ qyzmetkerleri qatarynan 68 mobıldi top quryldy.

Onyń quramyna 444 adam kirip otyr.

«Olar turaqty túrde reıd ótkizip jatyr. Sonyń nátıjesinde órt qaýipsizdigi talaptaryn buzǵan 39 adam anyqtaldy. Qoqys órtegen 38 azamatqa qatysty ákimshilik hattama toltyryldy. 11 adamǵa jalpy somasy 336 930 teńgeni quraıtyn aıyppul salynsa, 28-ine eskertý jasalǵan», - dedi oblystyq TJD memlekettik órt baqylaý basqarmasynyń bas mamany Medet Muqashev.

Qutqarýshylar shomylý maýsymy bastalǵaly beri 11 adam, onyń ishinde 1 bala sýǵa batqanyn aıtty.

«Jalpy oblysta sý qoımalarynyń sany 2000-nan asady. Alaıda olardyń kóbinde shomylýǵa tyıym salynǵan. Profılaktıkalyq sharalarǵa qaramastan demalýshylar qaýipsizdik erejelerin saqtamaı otyr. Oblys boıynsha jaz shyqqaly ruqsat etilmegen jaǵajaıda shomylǵan 70 adam jaýapqa tartylǵan. Sýdaǵy qaıǵyly oqıǵalardyń aldyn alý úshin halyqqa 26 402 jadynama men nusqaýlyq taratyldy. Maýsym aıynan beri shomylýǵa qaýipti jerlerde 222 tyıym salý belgisi ornatyldy», - dedi departamenttiń azamattyq qorǵanys basqarmasynyń aǵa ofıtseri Erik Tursynǵalıev.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT