ShQO-da táýelsizdik jyldary arheologııa salasynda 26 myń artefakt tabyldy
2021 jylǵy 15 jeltoqsan 22:25

ShQO-da táýelsizdik jyldary arheologııa salasynda 26 myń artefakt tabyldy

ÓSKEMEN. QazAqparat – Shyǵys Qazaqstan oblysynda táýelsizdik jyldary arheologııa salasynda 26 myń artefakt tabyldy, dep habarlaıdy QazAqparat tilshisi.

ShQO Mádenıet arhıvter jáne qujattama basqarmasynyń málimetinshe, el egemendik alǵannan bastap óńirde arheologııa salasyna kóp kóńil bólinip keledi.

«Ǵylymı-zertteý jumystaryn damytý baǵdarlamasy aıasynda oblystyń tarıhı-mádenı murasyn zertteýge jáne saqtaýǵa erekshe nazar aýdarylǵan. Sonyń nátıjesinde, Qazaqstannyń jetekshi arheologtary Zeınolla Samashev pen Ábdesh Tóleýbaevtyń basshylyǵymen 26 myń artefakt anyqtaldy. Sondaı-aq Shyǵys Qazaqstan Ulybrıtanııanyń London shaharyndaǵy «Uly Dala altyny» kórmesin qoıyp, sheteldikterdi tańqaldyrdy», - delingen aqparatta.

Budan bólek, aımaqta ShQO Óner murajaıynyń qor kollektsııasyn qalyptastyrý boıynsha aýqymdy jumystar júrgizilýde. «Rýhanı jańǵyrý» baǵdarlamasy jáne «Art Zaman» murajaı jobasy aıasynda Qazaqstannyń eń tanymal sýretshileriniń 66 týyndysy satyp alynǵan.

«Óner men mádenıettiń halyqty rýhanı baıytýda mańyzy zor. Bul baǵytta oblys boıynsha myńdaǵan maman jemisti eńbek etýde», - delingen habarlamada.


Jańalyqtar

MURAǴAT